مصر کا ترکی، سعودی عرب اور پاکستان کے دفاعی معاہدے میں شمولیت کا عندیہ

قاہرہ میں ترکیہ کے وزیر خارجہ حاقان فیدان کے ہمراہ ایک مشترکہ پریس کانفرنس سے خطاب کرتے ہوئے مصر کے وزیر خارجہ بدر عبدالعاطی نے انکشاف کیا ہے کہ مصر ترکیہ، سعودی عرب اور پاکستان کے درمیان طے پانے والے اہم دفاعی معاہدے میں شمولیت کے امکانات اور اس کی تفصیلات کا بغور جائزہ لے رہا ہے۔ مصری وزیر خارجہ کا کہنا تھا کہ خطے میں تیزی سے بدلتی ہوئی سیاسی و امن و امان کی صورتحال اور بڑھتی ہوئی کشیدگی کے پیش نظر علاقائی ممالک کے درمیان دفاعی تعاون کو مزید مضبوط بنانا وقت کی اہم ضرورت بن چکا ہے۔ انہوں نے واضح کیا کہ مصر علاقائی سلامتی اور استحکام کے لیے کی جانے والی تمام کوششوں کا جائزہ لے رہا ہے۔

اس موقع پر ترک وزیر خارجہ حاقان فیدان نے مصر کو ترکیہ کا “فطری شراکت دار” قرار دیتے ہوئے امید ظاہر کی کہ مصر جلد باضابطہ طور پر اس دفاعی شراکت داری کا حصہ بن جائے گا۔ حاقان فیدان نے بتایا کہ ترکیہ، سعودی عرب اور پاکستان کے درمیان ہونے والے اس دفاعی تعاون کا بنیادی مقصد اس شراکت داری کو زیادہ ادارہ جاتی اور پائیدار بنانا ہے تاکہ خطے میں امن و سلامتی کے لیے مشترکہ اقدامات کو مؤثر انداز میں آگے بڑھایا جا سکے۔ انہوں نے مزید کہا کہ اس تعاون کا مقصد کسی بھی ملک کے خلاف محاذ قائم کرنا نہیں، بلکہ خطے میں امن، استحکام اور اجتماعی سلامتی کو یقینی بنانا ہے۔