ہمایوں سعید تک پہنچنے میں مجھے 8 سال لگے: دراب خلیل

معروف ڈرامہ نگار خلیل الرحمٰن قمر کے بیٹے اور ابھرتے ہوئے اداکار دراب خلیل نے انکشاف کیا ہے کہ انہیں شوبز انڈسٹری میں اپنی جگہ بنانے اور ہمایوں سعید جیسے بڑے اسٹار تک پہنچنے کے لیے 8 سال کی طویل جدوجہد کرنی پڑی۔

ایک حالیہ ویب شو میں گفتگو کرتے ہوئے دراب خلیل نے واضح کیا کہ ان کے والد نے ان کے کیریئر کے لیے کبھی کسی پروڈیوسر یا ہدایت کار کو سفارشی فون نہیں کیا۔ خلیل الرحمٰن قمر کا ماننا ہے کہ اگر ان کے بیٹے میں ہنر ہے تو وہ خود راستہ بنائے گا، ورنہ اسے شوبز چھوڑ دینا چاہیے۔ دراب خلیل نے بتایا کہ انہیں ڈرامہ سیریل ’میں منٹو نہیں ہوں‘ میں بھی ان کی اپنی محنت اور ہنر کی بنیاد پر ہمایوں سعید اور ندیم بیگ نے کاسٹ کیا۔