اسلام آباد میں لائیو کنسرٹ کے دوران ڈرون حادثہ، گلوکارہ شائے گل زخمی

اسلام آباد کے علاقے پارک ویو سٹی میں جاری لائیو کنسرٹ کے دوران ابھرتی ہوئی عالمی شہرت یافتہ گلوکارہ شائے گل اس وقت زخمی ہو گئیں جب کنسرٹ کی ریکارڈنگ کے لیے استعمال ہونے والا ایک بے قابو ڈرون ان کے ہاتھ سے ٹکرا گیا۔

تفصیلات کے مطابق پرفارمنس کے دوران تیز رفتار ڈرون شائے گل کے انتہائی قریب آ گیا اور اچانک آپریٹر کے کنٹرول سے نکل کر ان کے ہاتھ سے ٹکرا گیا، جس کے باعث انہیں چوٹ آئی۔ واقعے کے بعد کنسرٹ میں کچھ دیر کے لیے تشویش کی فضا پیدا ہو گئی۔

حادثے کے بعد شائے گل نے سوشل میڈیا پر پیغام جاری کرتے ہوئے مداحوں کو آگاہ کیا کہ وہ خیریت سے ہیں اور کسی سنگین چوٹ سے محفوظ رہیں۔ انہوں نے کہا:
“میں بالکل ٹھیک ہوں، آپ سب کی دعاؤں اور خیریت پوچھنے کا بے حد شکریہ۔”

گلوکارہ کی جانب سے شیئر کی گئی ویڈیو میں ان کی کلائی اور ہاتھ پر کٹ کے نشانات اور خون کے دھبے بھی دیکھے جا سکتے ہیں۔

کنسرٹ منتظمین کے مطابق واقعہ ایک غیر پیشہ ور اور ناتجربہ کار ڈرون آپریٹر کی غفلت کے باعث پیش آیا۔ سوشل میڈیا پر مداحوں نے شدید تشویش کا اظہار کرتے ہوئے مطالبہ کیا ہے کہ بڑے کنسرٹس میں حفاظتی انتظامات اور ڈرون آپریٹرز کی پیشہ ورانہ اہلیت کو یقینی بنایا جائے تاکہ کسی بڑے حادثے سے بچا جا سکے۔