شوہر کا ڈاکٹر نبیہا پر مشکوک فطرت کا الزام، پرانا کلپ وائرل

حال ہی میں رشتہ ازدواج میں بندھنے والی ڈاکٹر نبیہا علی خان اور حارث کھوکھر کی شادی، جو سوشل میڈیا پر اپنی خوبصورتی کی وجہ سے وائرل تھی، اب اختلافات کی زد میں آگئی ہے۔ دونوں فریقین ایک دوسرے پر الزامات لگا کر علیحدگی اختیار کر چکے ہیں۔

ڈاکٹر نبیہا نے فضا علی کے رمضان پروگرام میں انکشاف کیا کہ انہیں سسرال میں ذہنی اذیت کا نشانہ بنایا گیا اور گھر سے نکالا گیا۔ اس دوران فضا علی بھی کافی جذباتی اور آبدیدہ نظر آئیں، جس پر سوشل میڈیا پر بحث چھڑ گئی۔حارث کھوکھر نے ان الزامات کو یکسر مسترد کرتے ہوئے کہا ہے کہ نبیہا اپنی مرضی سے گھر چھوڑ کر گئی ہیں۔ ان کے بقول نبیہا کی “شک کرنے والی طبیعت” نے رشتے کو خراب کیا کیونکہ وہ مسلسل ان پر باہر تعلقات رکھنے کا شبہ کرتی تھیں۔سوشل میڈیا پر ولیمے کے محض دو ماہ بعد کی ایک پرانی ویڈیو وائرل ہو رہی ہے جس میں حارث کھوکھر نے پہلے ہی اس بات کا تذکرہ کیا تھا کہ نبیہا کی طبیعت میں شک کا عنصر بہت زیادہ ہے۔ اس کلپ نے صارفین کو یہ سوچنے پر مجبور کر دیا ہے کہ اختلافات شادی کے ابتدائی دنوں سے ہی موجود تھے۔ جہاں صارفین کی ایک بڑی تعداد ڈاکٹر نبیہا کے ساتھ ہمدردی کا اظہار کر رہی ہے، وہیں حارث کے بیان کے بعد لوگ سوشل میڈیا پر پرائیویسی اور میاں بیوی کے نجی معاملات کو پبلک کرنے پر تنقید بھی کر رہے ہیں۔