امریکی صدر ٹرمپ کا پھر ایران کو سویابین اور گندم بیچنے کا دعویٰ

امریکی صدر ڈونلڈ ٹرمپ نے زراعت کے شعبے کی ترقی اور برآمدات بڑھانے کے لیے ایک نئے ایگزیکٹو آرڈر پر دستخط کر دیے ہیں۔وائٹ ہاؤس میں میڈیا سے گفتگو کرتے ہوئے امریکی صدر ڈونلڈ ٹرمپ نے کہا کہ ان کی انتظامیہ امریکی کسانوں کے لیے دنیا بھر میں نئی تجارتی مارکیٹیں کھول رہی ہے اور اس سلسلے میں نئی مارکیٹ “خوبصورت ایران” ہے۔ ان کا کہنا تھا کہ ایران کو اس وقت غذائی اجناس کی شدید قلت اور مشکلات کا سامنا ہے، اس لیے ہم ایرانی رقم کو امریکی گندم، سویابین اور مکئی خریدنے پر جلد خرچ کروائیں گے۔ایک طرف جہاں صدر ٹرمپ نے ایران کے لیے زرعی مارکیٹ کھولنے کی بات کی، وہیں دوسری جانب تہران کے جوہری پروگرام پر سخت موقف بھی برقرار رکھا۔ امریکی صدر نے واضح الفاظ میں کہا کہ اگر ایران کو ایٹمی ہتھیار مل گئے تو وہ اسے پہلے ہی گھنٹے میں استعمال کر ڈالے گا۔ انہوں نے عزم دہرایا کہ امریکا کسی بھی صورت ایران کو جوہری ہتھیار رکھنے کی اجازت نہیں دے سکتا۔