ڈکی بھائی کے ضبط شدہ اکاؤنٹس و سامان کی سپرداری کی درخواست خارج

ضلعی کچہری لاہور نے یوٹیوبر سعد الرحمان عرف “ڈکی بھائی” کے ضبط شدہ اکاؤنٹس اور سامان کی سپرداری سے متعلق کیس میں فریقین کے وکلا کے دلائل سننے کے بعد درخواست خارج کر دی۔

جوڈیشل مجسٹریٹ نعیم وٹو نے سماعت کی۔ این سی سی آئی اے کے وکیل نے عدالت کو بتایا کہ سعد الرحمان نے آٹھ ویڈیوز اپلوڈ کی ہیں، جبکہ یوٹیوب اکاؤنٹ اب بھی مالِ مقدمہ ہے، جس سے خدشہ ہے کہ ملزم شواہد کو ڈیلیٹ یا ایڈیٹ کر سکتا ہے۔

سعد الرحمان کے وکیل نے عدالت کو بتایا کہ بیانِ حلفی جمع کروایا جا چکا ہے اور ویڈیوز ان کے ایڈیٹر نے اپلوڈ کی ہیں، نہ کہ سعد الرحمان نے خود۔ عدالت نے ایڈیٹر کی شناخت پوچھی، جس پر سعد الرحمان نے بتایا کہ وہ حیدر آباد میں رہتا ہے۔

این سی سی آئی اے کے وکیل نے کہا کہ بعض اکاؤنٹس کے مالکان ایڈیٹرز کو رسائی نہیں دیتے، اس لیے ادارے کو خدشہ ہے کہ شواہد ضائع ہو سکتے ہیں۔