سندھ میں ڈینگی سے ایک اور ہلاکت، 131 نئے مریض رپورٹ

محکمۂ صحت سندھ نے صوبے میں ڈینگی کی موجودہ صورتحال سے متعلق تازہ رپورٹ جاری کر دی ہے۔ رپورٹ کے مطابق گزشتہ 24 گھنٹوں کے دوران ڈینگی سے ایک اور ہلاکت ہوئی ہے۔

رپورٹ میں بتایا گیا ہے کہ سندھ بھر کے سرکاری اسپتالوں میں 77 نئے مریض داخل ہوئے، جبکہ نجی اسپتالوں میں مزید 54 مریضوں کی تصدیق ہوئی ہے۔ اس کے بعد صوبے میں ڈینگی کے مجموعی مریضوں کی تعداد 109 تک پہنچ گئی ہے۔

کراچی ڈویژن کے سرکاری اسپتالوں میں 32 نئے مریض داخل ہوئے، جبکہ حیدرآباد کے سرکاری اسپتالوں میں 28 نئے مریض رپورٹ ہوئے۔ صوبے بھر کی سرکاری اور نجی لیبارٹریز میں 4,101 افراد کے ڈینگی ٹیسٹ کیے گئے، جن میں 449 مثبت کیسز سامنے آئے ہیں۔

رپورٹ کے مطابق کراچی کی لیبارٹریز میں سب سے زیادہ 215 مثبت کیسز درج کیے گئے ہیں۔ محکمۂ صحت نے عوام پر زور دیا ہے کہ ڈینگی سے بچاؤ کے لیے احتیاطی تدابیر اپنائیں۔