سیٹلائٹ ٹیکنالوجی کے ذریعے پنجاب میں براڈ بینڈ فراہمی کا فیصلہ

لاہور: سیٹلائٹ ٹیکنالوجی کے ذریعے پنجاب میں براڈ بینڈ انٹرنیٹ فراہم کرنے کا فیصلہ کر لیا گیا ہے۔ وزیراعلیٰ پنجاب مریم نواز کی ہدایت پر سیٹلائٹ براڈ بینڈ سے متعلق ایک اہم اجلاس وزیراعلیٰ آفس میں منعقد ہوا، جس کی صدارت سینئر مشیر سینیٹر انوشہ رحمان نے کی۔

اجلاس میں پنجاب کو سیٹلائٹ بیم کے ذریعے تیز ترین براڈ بینڈ فراہم کرنے پر تفصیلی مشاورت کی گئی۔ اس موقع پر ایم ڈی این ٹی سی، ڈی جی سپارکو اور سیکرٹری آئی ٹی پنجاب نے شرکت کی۔ اجلاس میں فیصلہ کیا گیا کہ دور دراز علاقوں میں تعلیمی اداروں اور ہسپتالوں کو براڈ بینڈ کی سہولت فراہم کی جائے گی اور اس مقصد کے لیے پاکستان کی جدید قومی سیٹلائٹ ٹیکنالوجی سے فائدہ اٹھایا جائے گا۔

اعلامیہ کے مطابق پنجاب قومی سیٹلائٹ سے براڈ بینڈ حاصل کرنے والا پہلا صوبہ ہوگا، جبکہ شمالی اور جنوبی پنجاب میں دو ہفتوں کے اندر ڈیمو اسٹیشن قائم کیے جائیں گے۔ چھ ماہ کے اندر صوبے کے دور دراز علاقوں میں سیٹلائٹ کے ذریعے براڈ بینڈ فراہمی کا ہدف مقرر کیا گیا ہے، جبکہ وزیراعلیٰ پنجاب نے صوبہ بھر کے عوام کو جدید ڈیجیٹل سہولیات فراہم کرنے کے عزم کا اظہار کیا ہے۔