کمپیوٹر ہیک کرنے کے لیے فلم ’دی اوڈیسی‘ کا استعمال، ہوشرُبا انکشاف

سائبر سیکیورٹی ماہرین نے انٹرنیٹ صارفین کو خبردار کیا ہے کہ ہیکرز حال ہی میں ریلیز ہونے والی بلاک بسٹر فلم ’دی اوڈیسی‘ (The Odyssey) کی مبینہ مفت ڈیجیٹل کاپیوں کے ذریعے کمپیوٹرز اور لیپ ٹاپس کو نشانہ بنا رہے ہیں۔

سائبر سیکیورٹی کمپنی بِٹ ڈیفینڈر (Bitdefender) کی جاری کردہ رپورٹ کے مطابق سال کی مقبول ترین فلموں میں شمار ہونے والی ’دی اوڈیسی‘ کو ابھی تک باضابطہ طور پر کسی بھی ڈیجیٹل یا او ٹی ٹی (OTT) پلیٹ فارم پر جاری نہیں کیا گیا۔ اس صورتحال کا فائدہ اٹھاتے ہوئے سائبر حملہ آوروں نے غیر قانونی اور پائریٹڈ سائٹس پر فلم کے نام سے ایک خطرناک وائرس ’لوما اسٹیلر‘ (Luma Stealer) پھیلانا شروع کر دیا ہے۔

ماہرین کا کہنا ہے کہ جیسے ہی کوئی صارف فلم کی ویڈیو فائل سمجھ کر اسے ڈاؤن لوڈ اور اوپن کرتا ہے، لوما اسٹیلر میلویئر فوری طور پر سسٹم میں فعال ہو جاتا ہے۔ یہ وائرس براؤزر میں محفوظ شدہ پاس ورڈز، کریڈٹ کارڈ و بینکنگ ڈیوٹیلز، ذاتی فائلز اور دیگر حساس ڈیٹا چوری کر کے ہیکرز کو بھیج دیتا ہے۔ ماہرینِ سیکیورٹی نے صارفین کو ہدایت کی ہے کہ وہ پائریٹڈ اور غیر مصدقہ ویب سائٹس سے ڈاؤن لوڈنگ سے مکمل گریز کریں اور صرف قانونی پلیٹ فارمز پر ہی بھروسہ کریں۔