واٹس ایپ پر ’’لاک ڈاؤن نوٹس‘‘ نہ کھولیں، ماہرین نے خبردار کردیا

ایران اور اسرائیل کے درمیان حالیہ کشیدگی اور ممکنہ توانائی بحران کی خبروں کی آڑ میں سائبر جرائم پیشہ عناصر نے معصوم شہریوں کو لوٹنے کا نیا طریقہ ڈھونڈ نکالا ہے۔ ہیکرز ان دنوں سوشل میڈیا بالخصوص واٹس ایپ پر ’’لاک ڈاؤن نوٹس‘‘ کے نام سے ایک خطرناک وائرس پھیلا رہے ہیں، جو ایک کلک پر آپ کے بینک اکاؤنٹ تک رسائی حاصل کر سکتا ہے۔

بھارتی شہر حیدرآباد سمیت مختلف علاقوں میں وائرل ہونے والی اس “وار لاک ڈاؤن نوٹس” فائل کے بارے میں سائبر ماہرین نے خبردار کیا ہے کہ یہ محض ایک نوٹس نہیں بلکہ ایک منظم ‘سوشل انجینئرنگ’ حملہ ہے۔ اس پی ڈی ایف فائل میں چھپا خفیہ جاوا سکرپٹ کوڈ فائل کھلتے ہی فون یا کمپیوٹر کی سکیورٹی میں نقب لگا دیتا ہے۔ اس کے ساتھ بھیجی جانے والی اے پی کے (APK) فائل انسٹال ہوتے ہی ہیکرز کو فون کے کیمرے، مائیک اور پیغامات کا مکمل کنٹرول دے دیتی ہے، جس سے بینک کے او ٹی پی (OTP) چوری کرنا اور اکاؤنٹ خالی کرنا انتہائی آسان ہو جاتا ہے۔

سائبر ماہرین نے عوام کو مشورہ دیا ہے کہ وہ کسی بھی نامعلوم نمبر سے موصول ہونے والی ایسی فائلوں کو ہرگز ڈاؤن لوڈ نہ کریں۔ بچاؤ کے لیے موبائل سیٹنگز میں “انسٹال ان نون ایپس” کا آپشن بند رکھیں اور کسی بھی مشتبہ فائل کو فوری طور پر ڈیلیٹ کر دیں۔ کسی بھی غیر معمولی سرگرمی کی صورت میں فوری طور پر اپنے فون کو قابل بھروسہ سکیورٹی ایپ سے سکین کرنا ضروری ہے تاکہ ذاتی ڈیٹا اور جمع پونجی کو محفوظ رکھا جا سکے۔