برقی کچرے سے نمٹنے کیلئے ’چاکلیٹ‘ سے بنا سرکٹ بورڈ تیار

انجینئرز نے الیکٹرانک کچرے میں نمایاں کمی لانے کے لیے بائیوڈیگریڈیبل سرکٹ بورڈ کی ایک بالکل نئی قسم تیار کر لی ہے، جو ماحول دوست ٹیکنالوجی کی جانب ایک اہم قدم قرار دی جا رہی ہے۔

اس جدید سرکٹ بورڈ کو یونیورسٹی آف گلاسگو کی تحقیقاتی ٹیم نے تیار کیا ہے، جو کاغذ، بایو پلاسٹک اور حتیٰ کہ چاکلیٹ جیسے قدرتی مواد سے بنایا جا سکتا ہے۔ یہ سرکٹ بورڈ عام مٹی میں محفوظ طریقے سے تحلیل ہونے کی صلاحیت رکھتا ہے، جس سے ماحولیاتی آلودگی میں واضح کمی ممکن ہو سکے گی۔

تحقیق کے مطابق اس نئی ٹیکنالوجی میں روایتی تانبے کے بجائے زنک کا استعمال کیا گیا ہے، جسے بایوڈیگریڈیبل سطحوں پر پرنٹ کیا جاتا ہے۔ ماہرین کے مطابق یہ طریقہ کار الیکٹرانک سرکٹ بورڈز کی دنیا میں ایک انقلابی تبدیلی ہے۔

نئے تیار کردہ سرکٹ بورڈز کارکردگی کے لحاظ سے روایتی سرکٹ بورڈز کے برابر ہیں اور انہیں ایل ای ڈی کاؤنٹرز اور درجہ حرارت ناپنے والے سینسرز سمیت مختلف آلات میں کامیابی سے آزمایا جا چکا ہے۔