اسرائیل نے سی آئی اے کی خفیہ اطلاع پر  تہران میں اعلیٰ قیادت کو نشانہ بنایا، امریکی میڈیا

امریکی میڈیا کی رپورٹ کے مطابق سی آئی اے نے ایرانی قیادت کے ایک اہم اجتماع کا سراغ لگایا جس کے بعد اسرائیل نے ایران پر حملہ کیا۔

نیویارک ٹائمز کے مطابق یہ کارروائی امریکی اور اسرائیلی انٹیلی جنس معلومات کی بنیاد پر کی گئی، جس کی منصوبہ بندی کئی ماہ سے جاری تھی۔ ابتدائی حکمتِ عملی کے تحت حملہ رات کے وقت ہونا تھا، تاہم تہران میں سرکاری کمپاؤنڈ میں اعلیٰ سطحی اجلاس کی اطلاع ملنے پر وقت تبدیل کرکے ہفتے کی صبح کارروائی کا فیصلہ کیا گیا۔

رپورٹ کے مطابق حملے سے کچھ دیر قبل سی آئی اے نے ممکنہ طور پر سب سے اہم ہدف آیت اللہ علی خامنہ ای کی درست نشاندہی کر لی تھی۔ ذرائع کا کہنا ہے کہ امریکی خفیہ ادارہ کئی ماہ سے ان کی نقل و حرکت اور قیام گاہوں پر گہری نظر رکھے ہوئے تھا۔

اطلاعات کے مطابق تہران کے وسطی علاقے میں واقع ایک کمپاؤنڈ میں اعلیٰ ایرانی حکام کا اہم اجلاس طے تھا جس میں سپریم لیڈر کی شرکت بھی متوقع تھی۔ اس خفیہ اطلاع کے بعد امریکا اور اسرائیل نے حملے کے وقت میں ردوبدل کیا۔

رپورٹ میں دعویٰ کیا گیا ہے کہ ممکنہ جنگ کے واضح اشاروں کے باوجود ایرانی قیادت مناسب حفاظتی اقدامات کرنے میں ناکام رہی۔