مکہ معاہدے میں شمولیت کی دعوت ملی تو ضرور غور کریں گے: بنگلہ دیش

ڈھاکہ: بنگلہ دیش کے وزیر خارجہ خلیل الرحمان نے اعلان کیا ہے کہ اگر ان کے ملک کو مکہ معاہدے (Makkah Pact) میں شمولیت کی باضابطہ دعوت دی گئی تو بنگلہ دیش اس پر مثبت انداز میں غور کرے گا۔

بنگلہ دیشی پارلیمنٹ میں اظہارِ خیال کرتے ہوئے وزیر خارجہ خلیل الرحمان نے کہا کہ ان کا ملک مکہ معاہدے کو انتہائی مثبت نظر سے دیکھتا ہے۔ انہوں نے واضح کیا کہ اس معاہدے میں توسیع عالمی مسلم برادری کے مشترکہ دفاع کے لیے ایک اہم اور مثبت اقدام ثابت ہو گی، جبکہ یہ معاہدہ مکمل طور پر مسلم ممالک کا داخلی معاملہ ہے اور اس حوالے سے کسی بھی قسم کی عالمی تشویش کی گنجائش نہیں ہے۔

واضح رہے کہ پاکستان، سعودی عرب اور ترکیہ مکہ معاہدے کے بانی ممالک ہیں، جس کا بنیادی مقصد رکن ممالک کے درمیان دفاعی اور سیکیورٹی تعاون کو مضبوط بنانا ہے۔ اس معاہدے کی اہم شق کے تحت کسی بھی ایک رکن ملک پر حملہ تمام دفاعی اتحادی ممالک پر حملہ تصور کیا جائے گا۔ اس معاہدے میں دیگر اسلامی ممالک کے لیے بھی شمولیت کے دروازے کھلے رکھے گئے ہیں اور مصر سمیت متعدد مسلم ممالک اس میں شامل ہونے کی خواہش اور آمادگی ظاہر کر چکے ہیں۔