فیلڈ مارشل سے سعودی وزیر ماحولیات کی ملاقات، باہمی امور پر تبادلہ خیال

راولپنڈی: فیلڈ مارشل و چیف آف ڈیفنس فورسز سید عاصم منیر سے جی ایچ کیو (GHQ) میں سعودی عرب کے وزیر برائے ماحولیات، پانی و زراعت انجینئر عبدالرحمان عبدالمحسن الفضلی نے اہم ملاقات کی، جس میں دوطرفہ تعلقات اور باہمی دلچسپی کے امور پر گفتگو کی گئی۔

پاک فوج کے شعبہ تعلقات عامہ (ISPR) کے مطابق ملاقات کے دوران فیلڈ مارشل سید عاصم منیر نے پاکستان اور مملکتِ سعودی عرب کے درمیان قائم گہرے، تاریخی اور برادرانہ تعلقات کی اہمیت کو اجاگر کیا۔ انہوں نے دونوں برادر ممالک کے مابین دیرینہ اسٹریٹجک شراکت داری کو مزید مستحکم اور فعال بنانے کے لیے پاکستان کے پختہ عزم کا اعادہ کیا۔

آئی ایس پی آر کے مطابق سعودی وزیر انجینئر عبدالرحمان عبدالمحسن الفضلی نے علاقائی امن، سلامتی اور استحکام کے فروغ میں پاکستان کے مثبت اور فعال کردار کو سراہا۔ انہوں نے دونوں ممالک کے درمیان تعاؤن کے شعبوں کو مزید وسعت دینے کی خواہش کا اظہار کیا، بالخصوص زراعت، پانی کے ذخائر کی بہتری اور ماحولیاتی پائیداری (Environmental Sustainability) کے میدان میں باہمی پیش رفت پر زور دیا۔