برطانیہ نے امریکا ایران جنگ میں پاکستان کا کردار سراہا: اسحاق ڈار

لندن: نائب وزیراعظم و وزیرِ خارجہ سینٹر اسحاق ڈار نے اپنے دورہ برطانیہ کو انتہائی کامیاب قرار دیتے ہوئے کہا ہے کہ عالمی بحری تنظیم (IMO) اور برطانوی حکام کے ساتھ ملاقاتیں انتہائی مثبت اور نتیجہ خیز رہیں۔

لندن میں ذرائع ابلاغ سے گفتگو کرتے ہوئے اسحاق ڈار نے بتایا کہ آئی ایم او کے حکام کے ساتھ ملاقات کے دوران بیرونی سمندر میں پھنسے ہوئے بحری جہاز کا معاملہ تفصیلی طور پر اٹھایا گیا، جس پر 10 پاکستانی شہری سوار ہیں۔ انہوں نے کہا کہ برطانیہ میں گرمیوں کی چھٹیوں کی تعطیلات کے باوجود برطانوی سیاست دانوں اور اعلیٰ حکام کے ساتھ اہم ملاقاتیں طے پائیں۔

نائب وزیراعظم نے بتایا کہ کامن ویلتھ کی سیکرٹری جنرل سے ان کی انتہائی اہم اور دوستانہ ملاقات ہوئی، جس میں انہوں نے وزیراعظم پاکستان کو کامن ویلتھ کے آنے والے سربراہی اجلاس کے لیے باضابطہ دعوت نامہ پیش کیا۔ علاوہ ازیں، برطانوی فارن سیکرٹری کے ساتھ بھی تفصیلی مذاکرات ہوئے۔

اسحاق ڈار نے مزید کہا کہ برطانوی حکام نے امریکہ اور ایران کے درمیان حالیہ کشیدگی اور جنگ کے دوران پاکستان کے مثبت و مصالحتی کردار کی بھرپور تعریف کی۔ انہوں نے اس بات کا اعادہ کیا کہ پاکستان کی معیشت اب مکمل طور پر بہتری اور استحکام کی جانب گامزن ہے۔