دماغ میں پیوند لگانے کا مختصر اور نسبتاً آسان طریقہ تیار

شنگھائی کی تکنیکی کمپنی “سٹیر میڈ ٹیکنالوجی” (StairMed Technology) نے دماغ میں پیوند (Brain Implant) لگانے کا ایک نیا اور آسان طریقہ تیار کرنے کا دعویٰ کیا ہے، جس کے تحت کھوپڑی کھولنے کی پیچیدہ سرجری کے بغیر یہ عمل صرف 10 منٹ میں مکمل کیا جا سکے گا। کمپنی کے شریک بانی ژاؤ ژینگ تو کے مطابق اس طریقہ کار میں آلہ گردن کی رگ کے ذریعے جسم میں داخل کر کے خون کی نالیوں کے راستے دماغ تک پہنچایا جاتا ہے اور اسے دماغی بافتوں کے بجائے خون کی نالی کی بیرونی دیوار کے ساتھ نصب کیا جاتا ہے۔ شنوو ہسپتال سے وابستہ ڈاکٹر دوان وان رو نے بتایا کہ درمیانے درجے کی مہارت رکھنے والا جراح بھی یہ پیوندکاری تقریباً 10 منٹ میں کر سکتا ہے، جبکہ روایتی دماغی سرجری یا دیگر طریقوں میں کھوپڑی کھول کر برقی آلات کی تنصیب کے لیے تقریباً 2 گھنٹے درکار ہوتے ہیں۔ گزشتہ ایک سال کے دوران چین کی بڑی ٹیکنالوجی کمپنیوں سمیت مختلف سرمایہ کاروں سے 1.1 ارب یوآن (تقریباً 16 کروڑ 30 لاکھ ڈالر) کی رقم حاصل کرنے والی یہ کمپنی فی الحال اپنے آلے کا بھیڑوں پر تجربہ کر رہی ہے۔ ماہرین کا کہنا ہے کہ اگر انسانوں پر کلینیکل ٹرائلز کے بعد یہ طریقہ کار کامیاب ثابت ہو جاتا ہے تو ہسپتالوں کے لیے برین کمپیوٹر انٹرفیس (BCI) ٹیکنالوجی کو طبی نظام کا حصہ بنانا انتہائی آسان اور محفوظ ہو جائے گا۔