زمین اور چاند کے درمیان ممکنہ تنازعات سے متعلق اہم انکشاف

بیجنگ: چین کی نارتھ ویسٹرن پولی ٹیکنیکل یونیورسٹی کی ایک تحقیقی ٹیم نے مستقبل میں زمین اور چاند کے درمیانی خلائی خطے (سیسلونر اسپیس) تک متوقع ملٹری اور اسٹریٹجک تنازعات کے پھیلاؤ کا تفصیلی سائنسی جائزہ لیا ہے۔

جرنل آف کمانڈ اینڈ کنٹرول میں شائع ہونے والی اس تحقیق میں محققین نے ایسے منظرناموں کا احاطہ کیا ہے جن میں حریف ممالک کے خلائی جہاز ایک دوسرے کا تعاقب کرنے، دفاعی نظاموں کو چکمہ دینے اور اہم خلائی نقل و حمل کے راستوں پر تسلط حاصل کرنے کی صلاحیتوں کا استعمال کر سکتے ہیں۔ تحقیق کے سربراہ ڈینگ ژاؤہوئی کے مطابق، سیسلونر اسپیس میں زمین اور چاند کی پیچیدہ کششِ ثقل کا فائدہ اٹھا کر خلائی جہازوں کو ایسے تزویراتی مقامات پر تعینات کیا جا سکتا ہے جہاں سے زمین کے نچلے مدار میں موجود اہداف پر اچانک کارروائی ممکن ہو۔

تحقیق میں خلائی راستوں کے “چوک پوائنٹس” (Choke Points) کی نشاندہی کی گئی ہے جہاں ایندھن کی بچت والے راستے آپس میں ملتے ہیں۔ چینی محققین کے مطابق ان مقامات پر تسلط حاصل کر کے کوئی بھی ملک براہِ راست فوجی تصادم کے بغیر اپنے حریف کے مشنز کو روکنے، تاخیر کا شکار کرنے یا راستہ تبدیل کرنے پر مجبور کر سکتا ہے، جس کے باعث سیسلونر خطہ مستقبل میں بین الاقوامی خلائی تنازعات کا اہم مرکز بن سکتا ہے۔