چینی سائنسدانوں کا نئی نسل کیلئے ہتھیار بنانے والا جنریٹر دریافت

بیجنگ: چینی سائنس دانوں نے ایک انتہائی طاقتور انرجی جنریٹر تیار کرنے کا دعویٰ کیا ہے جو مستقبل میں نئی نسل کے ڈائریکٹ انرجی ہتھیاروں کی تیاری کی بنیاد بن سکتا ہے۔ماہرین کے مطابق یہ پیش رفت ہائی پاور مائیکرو ویو ٹیکنالوجی کے میدان میں اہم سنگِ میل قرار دی جا رہی ہے۔

گزشتہ چند برسوں میں ہائی پاور مائیکرو ویو ہتھیار اپنی لامحدود فائرنگ صلاحیت اور کم لاگت کے باعث روایتی بندوقوں اور میزائلوں کے متبادل کے طور پر عالمی توجہ حاصل کر چکے ہیں۔ان ہتھیاروں کی خاصیت یہ ہے کہ یہ روایتی گولہ بارود کے بغیر اہداف کو متاثر کرنے کی صلاحیت رکھتے ہیں۔ رپورٹس کے مطابق چین، روس اور امریکا کے سائنس دان اس بات پر تحقیق کر رہے ہیں کہ آیا ایسی جدید ٹیکنالوجی تیار کی جا سکتی ہے جس کے ذریعے خلا میں موجود سیٹلائٹس کو غیر فعال یا تباہ کیا جا سکے۔

ماہرین کا کہنا ہے کہ روایتی ہتھیاروں کے ذریعے خلا میں سیٹلائٹس کو نشانہ بنانا نہایت مشکل اور خطرناک عمل ہے کیونکہ اس سے مدار میں ملبہ پھیل سکتا ہے، جس کے غیر متوقع نتائج سامنے آ سکتے ہیں، حتیٰ کہ اپنے ہی ملک کے سیٹلائٹس کو بھی نقصان پہنچنے کا خدشہ ہوتا ہے۔تھیوری کی سطح پر مائیکرو ویو ہتھیار اس مسئلے کا ممکنہ متبادل حل سمجھے جا رہے ہیں کیونکہ یہ کم سے کم ملبہ پیدا کیے بغیر سیٹلائٹس کو غیر فعال کرنے کی صلاحیت رکھتے ہیں۔