پبلک پروکیورمنٹ نظام میں شفافیت، جوابدہی اور نگرانی مزید مضبوط بنانے پر زور

وفاقی وزیر برائے قانون و انصاف سینیٹر اعظم نذیر تارڑ کی زیرِ صدارت کابینہ کمیٹی برائے تصفیہ قانون سازی مقدمات (سی سی ایل سی) کے اہم اجلاس میں پبلک پروکیورمنٹ ریگولیٹری اتھارٹی (پیپرا) آرڈیننس 2002 میں مجوزہ ترامیم، اوگرا ترمیمی بل 2026، سمیڈا آرڈیننس ترامیم اور ڈرافٹ پیٹرولیم رولز 2025 کی منظوری دے دی گئی ہے۔ اجلاس کے دوران پیپرا قوانین میں شفافیت، خود مختاری، ای پروکیورمنٹ کے فروغ اور شکایات کے آزادانہ ازالے پر خصوصی زور دیا گیا، جبکہ پیپرا رولز 2025 کے بعض امور کو قانون سازی کی مکمل منظوری تک مؤخر رکھنے کا فیصلہ ہوا۔ اس کے علاوہ پٹرولیم مصنوعات کی محفوظ نقل و حمل اور ذخیرے سے متعلق نئے حفاظتی قواعد کی بھی منظوری دی گئی۔ وفاقی وزیر قانون نے تاکید کی کہ سرکاری خریداریاں شفاف اور جدید تقاضوں کے مطابق بنانے کے لیے تمام تکنیکی و قانونی پہلوؤں کا جامع جائزہ لیا گیا ہے تاکہ اداروں میں شفافیت اور عوام کا اعتماد مزید بحال ہو سکے