میں اپنا میاں کسی کو نہیں دے سکتی: ثناء جاوید

پاکستانی معروف ماڈل و اداکارہ ثناء جاوید اپنی دوسری شادی کے بعد ایک بار پھر سوشل میڈیا پر بحث و تنقید کی زد میں آ گئی ہیں۔ حالیہ دنوں میں شوہر سے متعلق ان کا ایک مختصر مگر غیر متوقع بیان صارفین کو ناگوار گزرا، جس کے بعد اداکارہ کو شدید تنقید کا سامنا ہے۔

تفصیلات کے مطابق ثناء جاوید نے فوٹوز اینڈ ویڈیوز شیئرنگ پلیٹ فارم انسٹاگرام پر اپنے دبئی ٹرپ کی چند تصاویر شیئر کیں، جن میں انہیں ایک کیفے میں ناشتہ کرتے ہوئے دیکھا جا سکتا ہے۔ تصاویر کے کمنٹ سیکشن میں ایک صارف نے لکھا کہ ’’مجھے یہ فوٹوگرافر چاہیے‘‘ جس کے جواب میں اداکارہ نے کہا کہ ’’میں اپنا میاں کسی کو نہیں دے سکتی‘‘۔

اداکارہ کا یہ جواب سوشل میڈیا صارفین کو ایک آنکھ نہ بھایا اور متعدد صارفین نے اسے نامناسب قرار دیتے ہوئے تنقیدی تبصرے کیے۔ بعض صارفین کا کہنا تھا کہ ایسے جوابات غیر ضروری تنازع کو جنم دیتے ہیں، جبکہ کچھ نے اداکارہ کے اندازِ گفتگو پر سوال اٹھائے۔

یاد رہے کہ ثناء جاوید اپنی ذاتی زندگی اور حالیہ شادی کے بعد سے مسلسل سوشل میڈیا پر زیرِ بحث ہیں، جہاں ان کے بیانات اور سرگرمیوں پر صارفین کی گہری نظر رہتی ہے۔