وفاقی وزیر خزانہ محمد اورنگزیب کی زیر صدارت کابینہ کمیٹی کا اجلاس، سرکاری اداروں کے بورڈز میں شفافیت اور اہم تقرریوں کی منظوری

وفاقی وزیر خزانہ محمد اورنگزیب کی زیر صدارت کابینہ کمیٹی برائے سرکاری اداروں (CCoSOEs) کا ایک اہم اجلاس منعقد ہوا، جس میں سرکاری اداروں کے بورڈز میں شفاف طرزِ حکمرانی کو یقینی بنانے پر خصوصی زور دیا گیا۔ اجلاس کے جاری کردہ اعلامیے کے مطابق، کمیٹی نے فیصلہ کیا ہے کہ اب سے ہر سرکاری ادارے کے بورڈ میں متعلقہ وزارت کا صرف ایک ہی نمائندہ شامل ہوگا۔ اجلاس کے دوران پاکستان پٹرولیم لمیٹڈ (PPL) اور سینڈک میٹلز کے بورڈز کی تشکیل پر قانون کے مطابق غور کیا گیا، جبکہ پاکستان نیشنل شپنگ کارپوریشن (PNSC) کے بورڈ میں آزاد ڈائریکٹر کی تقرری کی منظوری دی گئی۔ اس کے علاوہ، سمال اینڈ میڈیم انٹرپرائزز ڈویلپمنٹ اتھارٹی (SMEDA) کی غیر تجارتی اور قانونی حیثیت برقرار رکھتے ہوئے اسے سرکاری تجارتی اداروں کی فہرست سے خارج کرنے کی منظوری دی گئی۔ دوسری جانب، توانائی کے شعبے کو انٹرنیشنل فنانشل رپورٹنگ اسٹینڈرڈز (IFRS) سے استثنا دینے کی تجویز کو فی الحال مؤخر کرتے ہوئے کمیٹی نے ہدایت کی کہ اس تجویز کو نظرثانی کے بعد دوبارہ پیش کیا جائے۔ اجلاس میں وفاقی وزراء، وفاقی سیکریٹریز اور دیگر اعلیٰ حکام نے شرکت کی۔