بشریٰ انصاری سوشل میڈیا پر جعلی اکاؤنٹس کے ذریعے پیسے بٹورنے کے واقعات پر برہم

پاکستانی ڈرامہ انڈسٹری کی سینئر اداکارہ بشریٰ انصاری نے سوشل میڈیا پر اپنے نام سے بنائے گئے جعلی اکاؤنٹس کے ذریعے عوام سے پیسے بٹورنے کے واقعات پر شدید برہمی کا اظہار کیا ہے۔

انسٹاگرام پر جاری ویڈیو پیغام میں بشریٰ انصاری نے کہا کہ نامعلوم عناصر ان کی تصاویر استعمال کر کے خود کو ان ظاہر کرتے ہیں اور خیرات و فلاحی کاموں کے نام پر لوگوں سے رقم طلب کرتے ہیں۔ انہوں نے واضح کیا کہ سوشل میڈیا پر موجود متعدد اکاؤنٹس ان کے نہیں ہیں اور عوام ان کے جھانسے میں نہ آئیں۔

اداکارہ کے مطابق کچھ جعلی اکاؤنٹس مذہبی دنوں کے موقع پر غریبوں کی مدد کے نام پر چندہ مانگتے ہیں جبکہ بعض این جی او بنانے کا دعویٰ کر کے بیواؤں اور نادار افراد کیلئے رقم طلب کرتے ہیں۔ انہوں نے ان حرکات کو سستی اور گھٹیا قرار دیتے ہوئے کہا کہ ایسے عناصر لوگوں کو بلیک میل بھی کر رہے ہیں۔

بشریٰ انصاری نے کہا کہ وہ اس مسئلے پر پہلے بھی آگاہی دے چکی ہیں، تاہم جعلی اکاؤنٹس کا سلسلہ تاحال جاری ہے۔ انہوں نے دو ٹوک الفاظ میں کہا کہ اگر وہ کبھی کسی کی مدد کرتی ہیں تو ذاتی طور پر اور خاموشی سے کرتی ہیں اور انہوں نے کبھی سوشل میڈیا کے ذریعے چندہ جمع نہیں کیا۔

اداکارہ نے عوام سے اپیل کی کہ سوشل میڈیا پر کسی بھی مشہور شخصیت کے نام سے پیسے مانگنے والے اکاؤنٹس پر اندھا اعتماد نہ کریں اور فراڈ سے ہوشیار رہیں۔