برٹنی اسپیئرز کا بڑا فیصلہ، گرفتاری کے بعد بحالی مرکز میں داخل

امریکی پاپ اسٹار برٹنی اسپیئرز نے نشے کی حالت میں ڈرائیونگ (DUI) کے الزام میں گرفتاری کے بعد اپنی زندگی کو دوبارہ پٹری پر لانے کے لیے اہم قدم اٹھاتے ہوئے خود کو رضاکارانہ طور پر ایک بحالی مرکز (Rehab) میں داخل کرا دیا ہے۔ 44 سالہ گلوکارہ کو 4 مارچ کو کیلیفورنیا کے شہر وینچورا میں منشیات اور الکحل کے زیرِ اثر گاڑی چلانے کے شبے میں حراست میں لیا گیا تھا، تاہم انہیں اگلے روز رہا کر دیا گیا۔ گلوکارہ کے نمائندے نے اس واقعے کو ‘ناقابلِ قبول’ قرار دیتے ہوئے تصدیق کی ہے کہ برٹنی اب اپنی ذمہ داری قبول کرتے ہوئے خود احتسابی اور شخصیت میں مثبت تبدیلیوں پر توجہ دے رہی ہیں۔

قریبی ذرائع کا کہنا ہے کہ برٹنی کے خاندان اور دوستوں کی جانب سے طویل عرصے سے انہیں پیشہ ورانہ مدد حاصل کرنے کا مشورہ دیا جا رہا تھا، جس پر انہوں نے اب رضامندی ظاہر کی ہے۔ رپورٹس کے مطابق، گلوکارہ کو اپنے اس عمل پر شدید افسوس ہے، خاص طور پر اپنی نجی زندگی اور بچوں پر پڑنے والے اثرات کے حوالے سے وہ کافی فکر مند ہیں۔ اس وقت بحالی مرکز میں ان کی تمام تر توجہ علاج اور ذہنی استحکام حاصل کرنے پر مرکوز ہے تاکہ وہ مستقبل میں ایسے واقعات سے بچ سکیں۔

قانونی طور پر برٹنی اسپیئرز کو 4 مئی کو عدالت میں پیش ہونا ہے جہاں ان کے خلاف ڈی یو آئی کیس کی سماعت ہوگی۔ ان کے ترجمان کا کہنا ہے کہ وہ قانون کا مکمل سامنا کریں گی اور امید ہے کہ بحالی مرکز میں گزارا گیا یہ وقت ان کی زندگی میں ایک نئے اور بہتر باب کا آغاز ثابت ہوگا۔ برٹنی کے مداحوں کی بڑی تعداد سوشل میڈیا پر ان کے اس فیصلے کی حمایت کر رہی ہے اور ان کی جلد صحت یابی کے لیے نیک تمناؤں کا اظہار کر رہی ہے۔