برطانیہ کا خلائی میدان میں بڑا قدم، خلا میں پہلی فیکٹری نے کام شروع کردیا

برطانیہ کے شہر کارڈف میں قائم جدید ٹیکنالوجی کمپنی اسپیس فورج نے خلا میں صنعت کاری کے شعبے میں ایک بڑی پیش رفت کرتے ہوئے مائیکروویو اوون کے سائز کی ایک منی فیکٹری کامیابی سے خلا میں بھیج دی ہے۔ غیر ملکی میڈیا رپورٹس کے مطابق یہ خلائی فیکٹری نہ صرف کامیابی سے مدار میں داخل ہو گئی ہے بلکہ اس کی بھٹی کو فعال کر کے ایک ہزار ڈگری سینٹی گریڈ تک درجہ حرارت حاصل کرنے کا تجربہ بھی کامیابی سے مکمل کر لیا گیا ہے۔

کمپنی کے مطابق یہ تجربہ خلا میں صنعتی پیداوار کے حوالے سے ایک اہم تکنیکی سنگِ میل ہے۔ اگلے مرحلے میں اس خلائی فیکٹری کے ذریعے سیمی کنڈکٹرز کی تیاری کے لیے درکار خصوصی مواد تیار کیا جائے گا، جسے بعد ازاں زمین پر واپس لا کر الیکٹرانکس، مواصلاتی نظام، کمپیوٹنگ، ٹرانسپورٹ اور دیگر جدید صنعتوں میں استعمال کیا جائے گا۔

ماہرین کا کہنا ہے کہ خلا کا ماحول سیمی کنڈکٹرز کی تیاری کے لیے انتہائی موزوں ہے، کیونکہ مائیکرو گریویٹی کی وجہ سے ایٹمز زیادہ درست ترتیب کے ساتھ جڑتے ہیں، جبکہ ویکیوم ماحول آلودگی کے خطرات کو بھی نمایاں طور پر کم کر دیتا ہے۔ اسی باعث خلا میں تیار ہونے والا مواد زمین پر بننے والے مواد کے مقابلے میں کہیں زیادہ خالص اور معیاری ہو سکتا ہے۔

اسپیس فورج کے چیف ایگزیکٹو جوش ویسٹرن کے مطابق خلا میں تیار کیے گئے سیمی کنڈکٹرز زمین پر تیار ہونے والوں کے مقابلے میں چار ہزار گنا زیادہ خالص ہو سکتے ہیں۔ ان کا کہنا تھا کہ مستقبل میں یہ جدید سیمی کنڈکٹرز فائیو جی ٹاورز، الیکٹرک گاڑیوں کے چارجرز، جدید طیاروں اور دیگر حساس ٹیکنالوجیز میں استعمال کیے جا سکیں گے۔

ماہرین کے مطابق اگر یہ منصوبہ کامیابی سے آگے بڑھتا ہے تو یہ خلا میں مینوفیکچرنگ کے ایک نئے دور کا آغاز ثابت ہو سکتا ہے، جو عالمی ٹیکنالوجی اور صنعت کے نقشے کو بدلنے کی صلاحیت رکھتا ہے۔