بالی ووڈ اداکارہ ہیما مالنی نے خاندان میں اختلافات کی تردید کردی

بالی ووڈ کی سینئر اداکارہ ہیما مالنی نے دھرمیندر کے انتقال کے بعد خاندان میں اختلافات سے متعلق گردش کرنے والی خبروں کی سختی سے تردید کر دی ہے۔

دھرمیندر کے انتقال کے بعد اُن کی یاد میں دو مختلف مقامات پر الگ الگ دعائیہ تقاریب منعقد کی گئیں، جس پر میڈیا اور سوشل میڈیا پر خاندان میں مبینہ اختلافات کی قیاس آرائیاں شروع ہو گئیں۔ تاہم ہیما مالنی نے ان خبروں کو بے بنیاد قرار دیتے ہوئے کہا کہ خاندان میں کسی قسم کی دراڑ یا تنازع موجود نہیں۔

ہیما مالنی کے مطابق تمام فیصلے باہمی مشاورت سے کیے گئے اور مختلف شہروں میں دعائیہ تقاریب منعقد کرنے کی وجہ خاندان کے سماجی اور سیاسی حلقوں سے وابستہ ذمہ داریاں تھیں۔ انہوں نے واضح کیا کہ یہ خالصتاً خاندانی معاملہ تھا اور سب کچھ خوش اسلوبی کے ساتھ انجام دیا گیا۔

اداکارہ نے مزید کہا کہ خاندان مکمل طور پر متحد ہے اور اختلافات کی خبریں حقیقت کے منافی ہیں۔ دوسری جانب سنی دیول اپنے والد دھرمیندر کے فارم ہاؤس کو میوزیم میں تبدیل کرنے کا منصوبہ بنا رہے ہیں۔

واضح رہے کہ دھرمیندر 24 نومبر کو 89 برس کی عمر میں انتقال کر گئے تھے، اور وہ اپنے پیچھے دو بیویاں اور چھ بچوں کو چھوڑ گئے۔