بالی ووڈ اداکارہ نے سوریا کمار سے متعلق بیان پر وضاحت پیش کر دی

بالی ووڈ اداکارہ خوشی مکھرجی نے بھارتی ٹی 20 کرکٹ ٹیم کے کپتان سوریا کمار یادیو سے متعلق دیے گئے اپنے بیان پر وضاحت جاری کر دی ہے۔ خوشی مکھرجی کا کہنا ہے کہ ان کا سوریا کمار یادیو سے کوئی رومانوی تعلق نہیں تھا اور ان کے بیان کو غلط تناظر میں پیش کیا گیا۔

خوشی مکھرجی نے یہ بھی دعویٰ کیا کہ ان کا انسٹاگرام اکاؤنٹ ہیک ہو گیا تھا، جس کے باعث غلط فہمیاں پیدا ہوئیں۔ ان کا کہنا تھا کہ ان سے منسوب بعض باتیں ان کے اصل مؤقف کی درست عکاسی نہیں کرتیں۔

یاد رہے کہ اس سے قبل ایک تقریب کے دوران خوشی مکھرجی نے کہا تھا کہ کئی کرکٹرز ان میں دلچسپی رکھتے ہیں، تاہم وہ کسی کرکٹر کو ڈیٹ نہیں کرنا چاہتیں۔ انہوں نے دعویٰ کیا تھا کہ سوریا کمار یادیو بھی انہی میں شامل تھے اور وہ انہیں پیغامات بھیجا کرتے تھے، تاہم اب دونوں کے درمیان زیادہ بات چیت نہیں ہوتی۔

دوسری جانب سوریا کمار یادیو کی جانب سے ان دعوؤں پر تاحال کوئی ردعمل سامنے نہیں آیا ہے۔