بلاول بھٹو، سرفراز بگٹی ملاقات، بلوچستان میں قیام امن کے لیے اے پی سی بلانے پر اتفاق

پاکستان پیپلز پارٹی کے چیئرمین بلاول بھٹو زرداری سے وزیراعلیٰ بلوچستان میر سرفراز بگٹی نے زرداری ہاؤس اسلام آباد میں ایک اہم ملاقات کی، جس میں بلوچستان کی سیاسی، انتظامی اور امن و امان کی مجموعی صورتحال پر تفصیلی تبادلہ خیال کیا گیا۔ ملاقات کے دوران وزیراعلیٰ بلوچستان نے چیئرمین پی پی پی کو صوبے میں دہشت گردی کی حالیہ لہر اور انتظامی امور پر تفصیلی بریفنگ دی۔ میر سرفراز بگٹی نے بتایا کہ زیارت سانحے کے لواحقین کی دلجوئی اور ان کے مطالبات کی تکمیل کے لیے حکومت نے فوری اقدامات کیے ہیں، جبکہ عزمِ انصاف کے تحت لواحقین کے مطالبے پر واقعے کی شفاف تحقیقات کے لیے جوڈیشل کمیشن بھی قائم کر دیا گیا ہے۔ انہوں نے بریفنگ میں مزید بتایا کہ بلوچستان میں مستقل قیامِ امن کے حوالے سے جلد ایک آل پارٹیز کانفرنس (APC) بلائی جا رہی ہے، جس میں پارلیمان کا حصہ رہنے والی اور پارلیمان سے باہر کی تمام سیاسی جماعتوں کو بھی شرکت کی دعوت دی جائے گی تاکہ مشترکہ حکمتِ عملی وضع کی جا سکے۔

ملاقات میں بلاول بھٹو زرداری نے دہشت گردی کی حالیہ لہر میں جامِ شہادت نوش کرنے والے پاک فوج، ایف سی اور پولیس کے بہادر اہلکاروں کو زبردست خراجِ عقیدت پیش کرتے ہوئے کہا کہ وہ متاثرہ خاندانوں کے غم کو برابر محسوس کرتے ہیں۔ انہوں نے زیارت سانحے کے لواحقین کے زخموں پر مرہم رکھنے اور مذاکراتی عمل کو خوش اسلوبی سے کامیاب بنانے میں وزیراعلیٰ بلوچستان کے متحرک کردار کو سراہا، جبکہ اس قومی عمل میں تعاون کرنے پر اپوزیشن جماعتوں کا بھی شکریہ ادا کیا۔ چیئرمین پیپلز پارٹی نے واشگاف الفاظ میں کہا کہ بلوچستان کے پیچیدہ سیاسی مسائل کا واحد حل صرف اور صرف ڈائیلاگ ہے اور پی پی پی ہمیشہ سے سیاسی جماعتوں کے ساتھ بامقصد سیاسی مذاکرات پر یقین رکھتی ہے، خواہ وہ حکومت کا حصہ ہوں یا اپوزیشن میں بیٹھی ہوں۔ بلاول بھٹو زرداری نے واضح کیا کہ دہشت گردی کے خلاف پیپلز پارٹی کا مؤقف پہلے دن سے انتہائی واضح ہے اور پوری قوم اس ناسور کے مکمل خاتمے کے لیے سیکورٹی اداروں کے ساتھ سیسہ پلائی ہوئی دیوار بن کر کھڑی رہے گی۔