بہروز سبزواری کے شوبز میں 50 سال مکمل، نامور فنکاروں کا شاندار خراجِ تحسین

پاکستانی اداکار بہروز سبزواری نے شوبز انڈسٹری میں اپنے 50 سال مکمل کر لیے، جس پر انہیں مختلف نامور فنکاروں، صحافیوں اور شخصیات نے شاندار خراجِ تحسین پیش کیا۔

لائف سٹائل جرنلسٹس ایسوسی ایشن کی جانب سے سی ویو پر ریسٹورنٹ میں منعقدہ تقریب میں فلم اور ڈرامہ انڈسٹری کے نامور ستارے جاوید شیخ، بشریٰ انصاری، سلیم شیخ، روبینہ اشرف، شبیر جان، نبیل ظفر، شہروز سبزواری اور دیگر شریک ہوئے۔ تھائی لینڈ، آسٹریلیا اور روس کے قونصل جنرلز نے بھی خصوصی شرکت کی۔

تقریب کے دوران بہروز سبزواری نے کیک کاٹا اور اظہارِ خیال کرتے ہوئے کہا کہ یہ دن ان کی زندگی کا یادگار لمحہ ہے۔ جاوید شیخ نے ان کے اخلاق اور فن کو سراہا، جبکہ روبینہ اشرف نے بیماری کے دوران ان کی انسانیت کی مثال بیان کی۔ تقریب میں بہروز سبزواری کے فنی سفر پر مبنی شوریل بھی پیش کیا گیا۔