بلوچستان دہشت گردی: امریکی ناظم الامور نیٹلی بیکر کا مذمتی بیان، پاکستان کی حمایت کا اعلان

امریکی ناظم الامور نیٹلی بیکر نے بلوچستان میں سکیورٹی فورسز اور عام شہریوں کو نشانہ بنانے والے دہشت گرد واقعات کی سخت مذمت کرتے ہوئے پاکستان کے ساتھ یکجہتی کا اظہار کیا ہے۔ ان کا کہنا تھا کہ امریکہ 31 جنوری کو ہونے والے حملوں کو شدید تشویش کی نگاہ سے دیکھتا ہے۔

نیٹلی بیکر نے بتایا کہ ان حملوں کی ذمہ داری بلوچستان لبریشن آرمی (بی ایل اے) نے قبول کی ہے، جو امریکہ کی جانب سے ایک نامزد غیر ملکی دہشت گرد تنظیم ہے۔ انہوں نے کہا کہ دہشت گرد تنظیمیں خطے کے امن اور عوام کے تحفظ کے لیے سنگین خطرہ ہیں۔

امریکی ناظم الامور نے دہشت گردی کے متاثرین، ان کے خاندانوں اور تمام متاثرہ افراد سے دلی تعزیت اور ہمدردی کا اظہار کیا۔ ان کا کہنا تھا کہ پاکستانی عوام کو یہ حق حاصل ہے کہ وہ بغیر خوف اور تشدد کے ایک محفوظ زندگی گزار سکیں۔

نیٹلی بیکر کے مطابق امریکہ، پاکستان کے امن و استحکام کے لیے کی جانے والی کوششوں میں ایک مضبوط شراکت دار ہے اور موجودہ مشکل حالات میں پاکستان کے ساتھ کھڑا ہے۔