بابر اعظم کی ون ڈے میں دو سال بعد سنچری، قومی ریکارڈ برابر کر دیا

راولپنڈی میں قومی ٹیم کے سابق کپتان اور مایہ ناز بیٹر بابر اعظم نے سری لنکا کے خلاف دو سال بعد شاندار سنچری اسکور کر کے ایک بار پھر اپنی کلاس ثابت کردی اور کئی بڑے اعزازات اپنے نام کر لیے۔

بابر اعظم نے 115 گیندوں پر 8 چوکوں کی مدد سے ون ڈے کیریئر کی 20ویں سنچری مکمل کی۔ ان کی آخری سنچری 30 اگست 2023 کو نیپال کے خلاف آئی تھی۔ بابر نے یہ سنگِ میل صرف 136 اننگز میں حاصل کیا۔

بابر اعظم نے اس سنچری کے ساتھ پاکستان کی جانب سے سب سے زیادہ ون ڈے سنچریوں کے سعید انور کے ریکارڈ کا بھی اشتراک کرلیا۔ سعید انور نے 244 اننگز میں 20 سنچریاں بنائی تھیں، جبکہ بابر اعظم نے یہ ریکارڈ انتہائی کم اننگز میں برابر کیا۔

بابر اعظم کم سے کم اننگز میں 20 سنچریاں مکمل کرنے والے دنیا کے تیسرے تیز ترین بیٹر بھی بن گئے۔

بابر کی اس اننگز نے نہ صرف پاکستان کی جیت میں اہم کردار ادا کیا بلکہ انہیں دوبارہ عالمی سطح پر ون ڈے کرکٹ کے بہترین بیٹرز کی صف میں نمایاں کردیا ہے۔