کم عمر بچوں کے سوشل میڈیا استعمال پر پابندی کی منظوری

ویانا: آسٹریا کی حکومت نے نوجوان نسل کو ڈیجیٹل دنیا کے منفی اثرات سے بچانے کے لیے ایک انقلابی قدم اٹھاتے ہوئے ملک بھر میں 14 سال سے کم عمر بچوں کے سوشل میڈیا استعمال پر مکمل پابندی کی منظوری دے دی ہے۔ نائب چانسلر نے ایک پریس کانفرنس کے دوران اس فیصلے کا اعلان کرتے ہوئے کہا کہ جس طرح دیگر مضرِ صحت اشیاء کے لیے عمر کی حد مقرر ہے، اسی طرح سوشل میڈیا پلیٹ فارمز کے لیے بھی حد بندی ضروری ہے کیونکہ یہ نوجوانوں کی ذہنی نشوونما پر منفی اثرات ڈال رہے ہیں۔

حکومتی منصوبے کے مطابق، یہ پابندی نہ صرف قومی سطح پر نافذ کی جائے گی بلکہ آسٹریا یورپی یونین (EU) کے دیگر ممالک کو بھی اس نوعیت کے اقدامات پر قائل کرنے کے لیے اپنی کوششیں جاری رکھے گا۔ اس پابندی کے ساتھ ساتھ تعلیمی نظام میں بھی بڑی اصلاحات کا اعلان کیا گیا ہے۔ تعلیمی سال 2027-28 سے اعلیٰ ثانوی نصاب میں میڈیا لٹریسی اور مصنوعی ذہانت (AI) کو بطور باقاعدہ مضامین شامل کیا جائے گا۔

نائب چانسلر کا مزید کہنا تھا کہ انفارمیٹکس کی کلاسز کو وسعت دے کر ان میں مصنوعی ذہانت کی تعلیم شامل کی جائے گی تاکہ طلبہ ڈیجیٹل نظام کے خطرات اور مواقع کو بہتر طور پر سمجھ سکیں۔ آسٹریا کا یہ اقدام آسٹریلیا اور دیگر ممالک کے نقشِ قدم پر چلتے ہوئے بچوں کی آن لائن حفاظت کو یقینی بنانے کی عالمی مہم کا حصہ ہے، جس کا مقصد نئی نسل کو ٹیکنالوجی کے ذمہ دارانہ استعمال کے قابل بنانا ہے۔