آسٹریلیا میں سمندری حیات کی ہلاکتوں کا معمہ حل

آسٹریلیا کی ریاست جنوبی آسٹریلیا میں گزشتہ سال لاکھوں سمندری جانداروں کی ہلاکت کا سبب بننے والی خردبینی الگئی کو سائنس دانوں نے اب تک کی دنیا کی سب سے زیادہ زہریلی الگئی قرار دے دیا ہے۔ جرنل ‘نیچر ایکولوجی اینڈ ایوولُوشن’ میں شائع ہونے والی ایک حالیہ تحقیق کے مطابق، مارچ 2025ء میں جنوبی آسٹریلیا کے ویٹپنگا بیچ اور وسیع ساحلی علاقوں پر ایک پراسرار جھاگ نمودار ہوا تھا، جس کے باعث بڑی تعداد میں مچھلیاں، سمندری گھوڑے، آکٹوپس، پرندے اور سمندری ممالیہ جاندار ہلاک ہو گئے تھے، جبکہ کئی سرفرز بھی کھانسی، گلے کی سوزش اور دھندلی نظر کی علامات کا شکار ہوئے تھے۔ محققین نے انکشاف کیا ہے کہ یہ تباہی ‘کیرینا کرِسٹاٹا’ نامی خردبینی الگئی سے خارج ہونے والے انتہائی طاقتور اعصابی زہریلے مادوں (Neurotoxins) کے باعث ہوئی تھی۔ لیبارٹری تجربات سے ثابت ہوا ہے کہ اس الگئی کے زہریلے اثرات اب تک زیرِ مطالعہ آنے والی تمام نقصان دہ اقسام سے کہیں زیادہ مہلک ہیں، جس نے خطے کے ماحول، معیشت اور عوامی صحت پر گہرے منفی اثرات مرتب کیے۔