پاکستان سپر لیگ میں شامل کی جانے والی دو نئی ٹیموں کی نیلامی کل منعقد ہوگی

کرکٹ بورڈ (پی سی بی) کی جانب سے نیلامی کا عمل اسلام آباد میں کیا جائے گا، جس میں نئی فرنچائزز کے حقوق باضابطہ آکشن کے ذریعے دیے جائیں گے۔

ذرائع کے مطابق پی ایس ایل میں توسیع کے منصوبے کے تحت شامل کی جانے والی دو نئی ٹیموں کے فرنچائز حقوق 10 سال کے لیے دیے جائیں گے۔ نیلامی کے عمل میں ملک اور بیرونِ ملک سے متعدد سرمایہ کار گروپس کی دلچسپی سامنے آئی ہے، جن سے توقع ہے کہ وہ آکشن میں بھرپور حصہ لیں گے۔

پی سی بی حکام کا کہنا ہے کہ لیگ میں مزید ٹیموں کی شمولیت کا مقصد پی ایس ایل کو تجارتی اور مسابقتی اعتبار سے مزید مضبوط بنانا اور نوجوان کھلاڑیوں کو زیادہ مواقع فراہم کرنا ہے۔

دوسری جانب، پی سی بی نے واضح کیا ہے کہ ملتان سلطانز کو عارضی طور پر پاکستان کرکٹ بورڈ خود چلائے گا۔ فرنچائز کے مستقل انتظام سے متعلق فیصلہ بعد میں کیا جائے گا، جس کے لیے الگ سے طریقہ کار وضع کیا جائے گا۔

پی سی بی کے مطابق نیلامی کے بعد نئی ٹیموں کی تیاری، برانڈنگ اور انتظامی معاملات کا آغاز فوری طور پر کیا جائے گا تاکہ آئندہ سیزن میں پی ایس ایل کا دائرہ کار مزید وسیع کیا جا سکے۔