گورنر سندھ کامران خان ٹیسوری سے لاہور قلندر کے سی ای او کی ملاقات

کراچی: گورنر سندھ کامران خان ٹیسوری سے لاہور قلندر کے چیف ایگزیکٹیو آفیسر عاطف رانا نے ملاقات کی، جس میں کرکٹ کے فروغ، پاکستان سپر لیگ (پی ایس ایل)، یوتھ پروگرامز اور دیگر باہمی دلچسپی کے امور پر تبادلۂ خیال کیا گیا۔

گورنر سندھ نے ملک میں کھیلوں کے فروغ کے لیے ہر ممکن تعاون کی یقین دہانی کراتے ہوئے کہا کہ نوجوانوں کو صحت مند سرگرمیوں کی جانب راغب کرنا حکومت کی اولین ترجیح ہے۔ ملاقات میں سندھ میں کرکٹ ٹیلنٹ کی نشوونما، نوجوان کرکٹرز کی بھرپور حوصلہ افزائی اور انہیں بہتر مواقع فراہم کرنے پر زور دیا گیا۔

لاہور قلندر کے سی ای او عاطف رانا نے کھیلوں اور کھلاڑیوں کی ترقی کے لیے گورنر سندھ کے تعاون اور حوصلہ افزائی کو سراہتے ہوئے ان کا شکریہ ادا کیا۔ ملاقات کے اختتام پر عاطف رانا نے گورنر سندھ کو لاہور قلندر کا سوینئر بھی پیش کیا۔