ارجیت سنگھ سمیت کئی بھارتی گلوکار عاطف اسلم سے متاثر ہیں، پالاش سین

معروف بھارتی گلوکار پالاش سین نے کہا ہے کہ پاکستانی گلوکار عاطف اسلم کی منفرد آواز اور اندازِ گائیکی نے بھارت میں مرد گلوکاروں کی ایک پوری نسل کو متاثر کیا، جن میں ارجیت سنگھ بھی شامل ہیں۔

ایک حالیہ انٹرویو میں 60 سالہ گلوکار پالاش سین نے کہا کہ عاطف اسلم کے بعد آنے والے بہت سے گلوکاروں نے ان کے انداز کو اپنانے کی کوشش کی۔ ان کے مطابق اگر غور سے دیکھا جائے تو ایک وقت میں تقریباً ہر گلوکار عاطف اسلم کی طرح گانے کی کوشش کرتا تھا۔

انہوں نے بتایا کہ ارجیت سنگھ بھی ابتدائی دور میں عاطف اسلم کے انداز میں گانے کی کوشش کرتے تھے، تاہم بعد میں انہوں نے اپنا الگ انداز بنا لیا۔ پالاش سین کا کہنا تھا کہ موسیقی کی دنیا میں ایسا اکثر ہوتا ہے کہ کوئی طاقتور آواز مقبول گائیکی کے انداز کو بدل دیتی ہے۔

انہوں نے مثال دیتے ہوئے کہا کہ ایک زمانے میں کمار سانو اور ابھجیت جیسے گلوکاروں پر محمد رفیع اور کشور کمار جیسے لیجنڈز کا اثر تھا۔ ان کے مطابق بااثر گلوکار ہمیشہ موسیقی کی دنیا پر گہرا اثر چھوڑتے ہیں اور کئی لوگ ان جیسا بننے کی کوشش کرتے ہیں۔

واضح رہے کہ عاطف اسلم پاکستان کے کامیاب ترین گلوکاروں میں شمار ہوتے ہیں، جنہوں نے بھارت اور پورے جنوبی ایشیا میں بھی بے پناہ مقبولیت حاصل کی۔ انہیں 2000ء کی دہائی کے آغاز میں بینڈ جال کے گانے عادت سے شہرت ملی۔ بعد ازاں انہوں نے بالی وڈ فلموں میں بھی کئی ہٹ گانے گائے جن میں تیرا ہونے لگا ہوں، تو جانے نہ، پہلی نظر میں، جینے لگا ہوں اور دل دیاں گلاں شامل ہیں۔