عاطف اسلم کو جرمنی میں برلن بڈی بیئر سے نواز دیا گیا
Web Desk
29 September 2026
پاکستان کے نامور اور بین الاقوامی شہرت یافتہ گلوکار عاطف اسلم نے موسیقی کی دنیا میں ایک اور شاندار اعزاز اپنے نام کر لیا ہے۔ جرمنی کے شہر برلن میں واقع مشہور اوبر ایرینا (Uber Arena) میں ایک کامیاب اور ہاؤس فل کنسرٹ کے بعد انہیں خصوصی برلن بڈی بیئر (Berlin Buddy Bear) سے نوازا گیا ہے۔
جرمنی میں ستمبر 2026ء کے دوران ہونے والے اس یادگار کنسرٹ کے بعد عاطف اسلم کو یہ خصوصی ایوارڈ دیا گیا، اور اب ان کی تصویر اوبر ایرینا کی اس خاص دیوار پر مستقل طور پر آویزاں کر دی گئی ہے جہاں دنیا بھر کے مایہ ناز فنکاروں کی تصاویر موجود ہیں۔ اس دیوار پر پہلے سے کیٹی پیری، ریحانہ اور ٹومورو ایکس ٹوگیدر (TXT) جیسے بین الاقوامی شہرت یافتہ فنکاروں کی تصاویر بھی درج ہیں۔ عاطف اسلم نے سوشل میڈیا پر ایک خصوصی ویڈیو بھی شیئر کی جس میں اس اعزازی دیوار پر ان کی تصویر کو دکھایا گیا، اس بڑی کامیابی پر ملک و بیرونِ ملک سے کئی معروف شخصیات اور مداحوں نے انہیں مبارکباد پیش کی ہے۔
برلن بڈی بیئر کی روایت اور عالمی ٹور:
واضح رہے کہ اوبر ایرینا میں ستمبر 2008ء سے یہ روایت چلی آ رہی ہے کہ وہاں ہاؤس فل شو کرنے والے یا نمایاں خصوصی ایونٹس منعقد کرنے والے نامور فنکاروں اور کھلاڑیوں کو خصوصی برلن بڈی بیئر پیش کیا جاتا ہے، جو کہ برلن شہر کی ثقافتی شناخت سے گہری وابستگی کی علامت سمجھا جاتا ہے۔
عاطف اسلم ان دنوں اپنے عالمی میوزک ٹور پر ہیں، جس کے سلسلے میں نومبر اور دسمبر کے دوران فرانس اور متحدہ عرب امارات (UAE) میں بھی ان کے بڑے کنسرٹس شیڈول ہیں۔ یاد رہے کہ رواں برس عاطف اسلم نے موسیقی کے میدان میں ایک بار پھر دھماکے دار واپسی کی ہے؛ انہوں نے 15 جون کو لندن کے او ٹو (O2) ایرینا میں اپنے نئے میوزک پروجیکٹ کا اعلان کیا تھا، جبکہ ان کا طویل انتظار کے بعد چوتھا اسٹوڈیو البم ’صبح آئے نہ‘ 31 جولائی 2026ء کو ریلیز کیا گیا۔ یہ البم سال 2008ء میں ریلیز ہونے والے ان کے انتہائی مقبول البم ’میری کہانی‘ کے بعد پہلا مکمل اسٹوڈیو البم ہے۔
گزشتہ برس بھی عاطف اسلم پاکستان کے سب سے زیادہ سنے جانے والے سرفہرست فنکاروں میں شامل رہے تھے، جبکہ ان کی دلکش موسیقی کو اب تک مجموعی طور پر تقریباً 8 ارب بار مختلف ڈیجیٹل پلیٹ فارمز پر اسٹریم کیا جا چکا ہے۔
متعلقہ عنوانات
ٹک ٹاکر کی مہندی تقریب میں دو افراد کی ہلاکت کیس میں اہم پیشرفت
21 November 2026
حنا جاوید قتل کیس: پولیس نے چالان میں گھریلو ملازم ذیشان کو مرکزی ملزم قرار دے دیا
21 November 2026
روسی وزارت خارجہ کی پریس بریفنگ میں پاکستانی اداکارہ دنانیر مبین کی کامیابی کا خصوصی ذکر
21 November 2026
سینئر اینکر پرسن ربیعہ احسن قتل کیس، ملزم احسن طاہر اڈیالہ جیل سے رہا
20 November 2026
شازیہ منظور کی جائیداد پر مبینہ قبضے کی کوشش، 2 ملزمان گرفتار
20 November 2026
مس یونیورس ویتنام سے 48 روز بعد ہی تاج واپس لے لیا گیا
20 November 2026
عالمی آرٹ میلے میں پاکستانی ثقافت کی نمائندگی، گلوکار عظیم ڈار کو گیسٹ آف آنر کا اعزاز
20 November 2026
گلوکارہ شازیہ منظور کے گھر مسلح افراد کا حملہ، جان سے مارنے کی دھمکیاں
19 November 2026