عاصم اظہر نے ہانیہ عامر کی پوسٹس ری اسٹور کردیں

پاکستان کے معروف اور ہر دلعزیز گلوکار عاصم اظہر نے فوٹو اور ویڈیو شیئرنگ ایپ انسٹاگرام پر اپنی 600 سے زائد پرانی پوسٹس، تصاویر اور ویڈیوز کو اچانک ری اسٹور (بحال) کر دیا ہے، جن میں اداکارہ ہانیہ عامر کے ساتھ ماضی میں شیئر کی گئی تصاویر بھی شامل ہیں۔

عاصم اظہر نے اپنی انسٹاگرام پروفائل پر ان پرانی یادوں کو دوبارہ لاتے ہوئے دلچسپ کیپشن لکھا کہ ’’آپ سب کو خوش آمدید، کچھ پرانے اور شرمندگی سے بھرے لمحات کا لطف اٹھائیں۔‘‘ جیسے ہی گلوکار کی پرانی پوسٹس ان کے اکاؤنٹ پر دوبارہ نظر آنا شروع ہوئیں، تو سوشل میڈیا صارفین نے اداکارہ ہانیہ عامر کے ساتھ ان کی تصاویر پر خصوصی توجہ دی اور مداح فوری طور پر ماضی کی یادوں میں کھو گئے۔ پوسٹس کی بحالی کے فوراً بعد ہی مختلف شوبز پلیٹ فارمز اور تفریحی صفحات نے ان مخصوص تصاویر کو نمایاں کر کے شیئر کرنا شروع کر دیا۔

میڈیا اور سوشل میڈیا پیجز پر صرف ہانیہ عامر کے ساتھ تصاویر کو ہی ہائی لائٹ کیے جانے پر عاصم اظہر نے اپنی انسٹاگرام اسٹوری پر اس کے پیچھے چھپے اصل ارادوں کی وضاحت کی اور شوبز میڈیا کو گلہ بھی کیا۔ انہوں نے لکھا، ’’دوستو! کاش ہمارا پیارا میڈیا میری باقی کی 600 پوسٹس بھی دکھاتا جو میں نے بحال کی ہیں۔ میرے سچے مداح ایک طویل عرصے سے میری پوسٹس، میرا پرانا سفر اور میری کامیابیاں دوبارہ دیکھنا چاہتے تھے، اسی لیے میں نے انہیں آرکائیو سے نکال کر واپس لایا ہوں۔‘‘

واضح رہے کہ ماضی میں ہانیہ عامر اور عاصم اظہر اپنے قریبی تعلقات کی قیاس آرائیوں کی وجہ سے اکثر میڈیا کی سرخیوں میں رہتے تھے، تاہم دونوں اسٹارز نے کبھی بھی عوامی سطح پر اپنے ماضی کے تعلقات کی اصل نوعیت پر کھل کر بات نہیں کی۔

دوسری جانب، عاصم اظہر نے رواں ماہ کے شروع میں ہسپتال سے اپنی ایک تصویر شیئر کر کے اپنے چاہنے والوں کو شدید تشویش میں مبتلا کر دیا تھا۔ “میری زندگی ہے تو” جیسے سپر ہٹ گانے کے گلوکار نے اپنی انسٹاگرام اسٹوری پر ایک سیلفی پوسٹ کی تھی جس میں وہ نیبولائزر ماسک پہنے نظر آ رہے تھے، اور ساتھ ہی انہوں نے لکھا تھا “ویلکم بیک”۔ اس تصویر پر مداحوں کی جانب سے فکرمندی کے پیغامات آنے کے بعد عاصم نے اپنے اگلے ہی پیغام میں واضح کیا تھا کہ کوئی سنگین مسئلہ نہیں ہے، وہ محض ٹونسلز کے انفیکشن سے صحت یاب ہو رہے ہیں۔ انہوں نے اپنے چاہنے والوں کو تسلی دیتے ہوئے لکھا تھا، ’’اوکے معذرت، میرا مقصد مداحوں کو پریشان کرنا نہیں تھا، بس ٹونسلز کا عام انفیکشن ہوا ہے۔‘‘