ارشد چائے والا نے پاسپورٹ تجدید کیلئے اسلام آباد ہائیکورٹ سے رجوع کرلیا

‘ارشد چائے والا’ کے نام سے شہرت حاصل کرنے والے معروف انٹرپرینیور ارشد خان نے پاسپورٹ کی تجدید نہ ہونے پر اسلام آباد ہائیکورٹ سے رجوع کر لیا ہے۔

ارشد خان نے بیرسٹر عمر اعجاز گیلانی کی وساطت سے عدالتِ عالیہ میں آئینی درخواست دائر کی، جس میں مؤقف اختیار کیا گیا ہے کہ درخواست گزار ایک معروف بین الاقوامی بزنس مین ہیں جو عالمی سطح پر پاکستانی ثقافت اور برانڈ کو فروغ دے چکے ہیں۔ درخواست میں بتایا گیا کہ نادرا (NADRA) کا ویری فکیشن بورڈ ان کا شناختی کارڈ پہلے ہی کلیئر کر چکا ہے اور اس وقت بھی ان کا شناختی کارڈ مکمل طور پر فعال ہے۔

درخواست کے مطابق ارشد خان نے 23 اگست 2025ء کو پاسپورٹ کی تجدید (Renewal) کے لیے درخواست دی تھی، تاہم ایک سال کا طویل عرصہ گزرنے کے باوجود انہیں پاسپورٹ جاری نہیں کیا گیا۔ انہوں نے سیکرٹری داخلہ کے دفتر اور متعلقہ حکام کو متعدد بار رجوع کرنے اور لیگل نوٹس بھیجنے کے باوجود کوئی جواب نہ ملنے پر عدالت کا دروازہ کھٹکھٹایا ہے۔ درخواست میں وفاق (بذریعہ سیکرٹری داخلہ) اور ڈائریکٹر جنرل امیگریشن اینڈ پاسپورٹ کو فریق بناتے ہوئے استدعا کی گئی ہے کہ پاسپورٹ روکے رکھنے کے اقدام کو غیر قانونی قرار دے کر تجدید شدہ پاسپورٹ فوری جاری کرنے کا حکم دیا جائے۔