’میرے گانے اپنے غلط کاموں کیلئے استعمال نہ کریں‘، آریانا گرانڈے ٹرمپ کی ٹیم پر برس پڑیں

واشنگٹن: معروف امریکی پاپ گلوکارہ آریانا گرانڈے نے امریکی صدر ڈونلڈ ٹرمپ کی آفیشل کمپین ٹیم کو اپنی موسیقی اور گانے کسی بھی قسم کے سیاسی و انتخابی مقاصد کے لیے استعمال کرنے سے سختی سے منع کر دیا ہے۔

یہ تنازع اس وقت کھڑا ہوا جب ڈونلڈ ٹرمپ کی آفیشل ٹیم کے ٹک ٹاک (TikTok) اکاؤنٹ پر ایک ویڈیو پوسٹ کی گئی، جس میں آریانا گرانڈے کا وائرل اور مقبول ترین گانا ‘وی کانٹ بی فرینڈز’ (We Can’t Be Friends) پس منظر میں استعمال کیا گیا تھا۔ اس ویڈیو میں ڈونلڈ ٹرمپ کو ایک سیاسی ریلی کے دوران اسٹیج کی طرف جاتے ہوئے دکھایا گیا، جبکہ ویڈیو کے اندر ٹرانس جینڈر افراد اور خواتین کے کھیلوں میں شرکت کے حوالے سے سیاسی بیانیہ بھی پیش کیا گیا۔

گلوکارہ آریانا گرانڈے نے مذکورہ ٹک ٹاک ویڈیو پر براہِ راست تبصرہ (Comment) کرتے ہوئے شدید غصے کا اظہار کیا اور لکھا: “میری موسیقی کو دوبارہ کبھی استعمال نہ کریں، اور جسے آپ سچ کہہ کر پیش کر رہے ہیں وہ بالکل غلط ہے۔”

یہ پہلا موقع نہیں ہے جب 33 سالہ گلوکارہ نے ٹرمپ انتظامیہ اور ان کی ٹیم کے خلاف اپنی موسیقی کے استعمال پر آواز اٹھائی ہو۔ اس سے قبل رواں برس جون میں بھی وائٹ ہاؤس کے آفیشل ٹک ٹاک اکاؤنٹ نے امیگریشن پالیسیوں اور کریک ڈاؤن سے متعلق ایک ویڈیو میں ان کا مشہور گانا ‘بائے’ (Boy) استعمال کیا تھا، جس پر گلوکارہ نے شدید احتجاج درج کرایا تھا۔ آریانا کے سخت اعتراض کے بعد اس وقت ویڈیو کا آڈیو میوٹ (Mute) کر دیا گیا تھا۔