متوقع آئی فون 20 سے متعلق نئی اطلاعات سامنے آگئیں

ٹیکنالوجی کی دنیا کے سب سے مقبول برانڈ ایپل کے متوقع اسمارٹ فون ‘آئی فون 20’ کے حوالے سے نئی اور سنسنی خیز تفصیلات سامنے آئی ہیں، جن کے مطابق کمپنی 2027 میں پیش کیے جانے والے اس فلیگ شپ ماڈل کے لیے ایک بار پھر شیشے پر مبنی روایتی ڈیزائن اپنانے پر سنجیدگی سے غور کر رہی ہے۔ چینی ٹیک لیکر ‘فکسڈ فوکس ڈیجیٹل’ نے سوشل میڈیا پلیٹ فارم ویبو پر دعویٰ کیا ہے کہ آئی فون 20 کی تیاری کے لیے ایک مخصوص پروڈکشن سائٹ کی تزئین و آرائش کا کام مکمل کر لیا گیا ہے، جہاں جلد ہی نئے پرزوں کی تیاری کے لیے جدید مشینری نصب کی جائے گی۔ رپورٹ کے مطابق، ‘بریل کرسٹل’ کو اس اہم منصوبے کا مرکزی سپلائر قرار دیا جا رہا ہے، جبکہ بی وائے ڈی (BYD) اور لینس ٹیکنالوجی بھی اس مینوفیکچرنگ سپلائی چین کا حصہ ہوں گی۔ ذرائع کا کہنا ہے کہ اس منصوبے کے لیے کچھ پرانا مینوفیکچرنگ سازوسامان بھی دوبارہ استعمال میں لایا جا سکتا ہے، جبکہ سام سنگ اور ایل جی ڈسپلے کو آئی فون 20 کی متوقع خم دار (Curved) اسکرین کی تیاری سے جوڑا جا رہا ہے۔ تاہم، کمپنی کی جانب سے تاحال ان افواہوں پر کوئی باضابطہ تصدیق یا تردید سامنے نہیں آئی ہے۔