ایپل کا پہلا فولڈ ایبل آئی فون کب متعارف کرایا جائے گا؟ ممکنہ تاریخ سامنے آگئی

ٹیکنالوجی کی دنیا میں تہلکہ مچانے کے لیے ایپل نے اپنے پہلے ‘فولڈ ایبل آئی فون’ پر کام تیز کر دیا ہے، جس کے حوالے سے نئی لیکس میں دعویٰ کیا گیا ہے کہ اسے ستمبر 2026 میں آئی فون 18 پرو سیریز کے ساتھ بطور ‘الٹرا ماڈل’ متعارف کرایا جائے گا۔ یہ پریمیئم اسمارٹ فون کتاب کی طرح کھلنے والے ڈیزائن سے لیس ہوگا، جس کا بیرونی ڈسپلے 5.5 انچ جبکہ اندرونی فولڈ ایبل اسکرین 7.8 انچ پر مشتمل ہوگی۔ ایپل اس ڈیوائس کو پائیدار بنانے کے لیے انتہائی پتلے گلاس، لیکوئیڈ میٹل اور 3 ڈی پرنٹڈ پرزہ جات کی آزمائش کر رہا ہے، تاکہ یہ نہ صرف مضبوط ہو بلکہ لچکدار بھی رہے۔ رپورٹ کے مطابق، یہ فون کھلنے کے بعد محض 4.5 سے 4.8 ملی میٹر جبکہ فولڈ ہونے پر 9.6 ملی میٹر پتلا ہوگا، جو اسے مارکیٹ کی متاثر کن ترین ڈیوائسز میں شامل کر دے گا۔

تکنیکی خصوصیات کے حوالے سے بتایا گیا ہے کہ اس فولڈ ایبل آئی فون میں جدید ترین ‘اے 20 پرو’ چپ اور 5500 ایم اے ایچ کی طاقتور بیٹری دی جائے گی، جو گیمنگ، ویڈیو ایڈیٹنگ اور ملٹی ٹاسکنگ کے تجربے کو مکمل طور پر بدل دے گی۔ فون کا کیمرا ڈیزائن آئی فون ‘ایئر’ سے مماثلت رکھتا ہوگا لیکن مکمل سیاہ رنگ میں دو کیمروں، مائیکرو فون اور فلیش کے ساتھ اسے ‘آئی پیڈ پرو’ جیسی پروفیشنل لک دی جائے گی۔ ماہرین کا کہنا ہے کہ یہ نیا ماڈل روایتی آئی فونز سے بالکل مختلف ہوگا اور صارفین کو اسمارٹ فون استعمال کرنے کا ایک اچھوتا اور انقلابی احساس فراہم کرے گا، جو ایپل کے لیے فولڈ ایبل مارکیٹ میں داخلے کا ایک بڑا سنگِ میل ثابت ہوگا۔