ایپل نے پہلی بار پاکستان میں گورنمنٹ افیئرز کیلئے اپنا نمائندہ تعینات کردیا

عالمگیر شہرت یافتہ معروف ٹیکنالوجی کمپنی ‘ایپل’ نے سلمان ڈار کو پاکستان میں اپنے ‘گورنمنٹ افیئرز’ (حکومتی امور) کا نیا سربراہ مقرر کر دیا ہے۔ سلمان ڈار نے بزنس و نیٹ ورکنگ پلیٹ فارم ‘لنکڈ اِن’ (LinkedIn) پر اپنی اس نئی ذمہ داری کا باضابطہ اعلان کیا۔ وہ پاکستان میں ایپل کے حکومتی و انتظامی معاملات کی قیادت کریں گے اور ملک کے مختلف ریگولیٹری اداروں، پالیسی سازوں اور دیگر اہم سٹیک ہولڈرز کے ساتھ کمپنی کے سٹریٹجک روابط کو استوار و فعال رکھنے میں اپنا کلیدی کردار ادا کریں گے۔

سلمان ڈار کی یہ اہم تقرری ایک ایسے وقت میں سامنے آئی ہے جب حکومتِ پاکستان عالمی ٹیکنالوجی کمپنیوں اور سمارٹ فون برانڈز کو ملک کے اندر ہی موبائل فونز اور دیگر الیکٹرانک ڈیوائسز کی مقامی سطح پر اسمبلنگ و مینوفیکچرنگ کی طرف راغب کرنے کے لیے بھرپور کوششیں کر رہی ہے۔

حکومتی سطح پر ایپل کو بھی پاکستان میں آئی فون کی مقامی پیداوار اور اسمبلی پلانٹ شروع کرنے پر آمادہ کرنے کے لیے سنجیدہ اقدامات کیے جا رہے ہیں۔ اس مقصد کے لیے ریگولیٹری ماحول کو مزید سازگار بنانے، درآمدی و مینوفیکچرنگ پالیسیوں میں آسانیاں پیدا کرنے اور غیر ملکی سرمایہ کاری کی راہ میں حائل رکاوٹوں کو دور کرنے پر خصوصی توجہ دی جا رہی ہے، تاکہ ملک میں ٹیکنالوجی کے شعبے کو تقویت مل سکے۔