این ہیتھوے دنیا کی سب سے خوبصورت اداکارہ قرار

ہالی ووڈ کی نامور اداکارہ این ہیتھوے نے ایک بار پھر دنیا کی توجہ اپنی جانب مبذول کروا لی ہے، جہاں مشہورِ زمانہ ‘پیپل میگزین’ نے انہیں 2026 کی دنیا کی سب سے خوبصورت سٹار قرار دیا ہے۔ چاندی کی کڑھائی والے دلکش لباس میں ملبوس سرورق کی زینت بننے والی 44 سالہ اداکارہ کے لیے یہ اعزاز ان کے شاندار کیریئر کا ایک اور روشن باب ہے۔ اس موقع پر انہوں نے نہ صرف اپنے ماضی کے یادگار کرداروں پر بات کی بلکہ فلمی صنعت میں خوبصورتی اور اداکاری کے بدلتے ہوئے معیار پر بھی اپنے خیالات کا اظہار کیا۔

اپنی گفتگو کے دوران این ہیتھوے نے 2006 کی شہرہ آفاق فلم ‘دی ڈیول ویئرز پرادا’ (The Devil Wears Prada) کی یادیں تازہ کیں اور اسے اپنے کیریئر کا سب سے دباؤ والا مگر یادگار تجربہ قرار دیا۔ انہوں نے اپنے ساتھی اداکاروں میرل اسٹریپ، ایملی بلنٹ اور اسٹینلے ٹوچی کی صلاحیتوں کو بھی بھرپور انداز میں سراہا۔