اداکارہ انیقہ ذو الفقار کو کشمیری چوڑیوں کی تلاش

لاہور: پاکستان کی معروف اداکارہ انیقہ ذوالفقار ان دنوں سوشل میڈیا پر وائرل ہونے والی منفرد ‘کشمیری چوڑیوں’ کی تلاش میں ہیں، تاہم انہیں اب تک یہ چوڑیاں کہیں سے دستیاب نہیں ہو سکیں۔ اپنے ایک حالیہ انٹرویو میں اداکارہ نے انکشاف کیا کہ وہ بھی ان وائرل چوڑیوں کو خریدنے کی خواہش مند ہیں، لیکن انہیں یہ معلوم نہیں ہو پا رہا کہ یہ چوڑیاں بازار میں کہاں دستیاب ہیں۔

انیقہ ذوالفقار نے گفتگو کے دوران ہنستے ہوئے اپنے مداحوں سے ایک دلچسپ درخواست بھی کر ڈالی۔ انہوں نے کہا، “مجھے تو یہ وائرل چوڑیاں ڈھونڈنے میں اب تک ناکامی کا سامنا رہا ہے، لیکن اگر میرا کوئی فین چاہے تو مجھے عید کے تحفے کے طور پر یہ بھجوا سکتا ہے۔” اداکارہ نے قہقہہ لگاتے ہوئے مزید کہا کہ اگر کسی کو یہ چوڑیاں ملیں تو وہ پلیز انہیں بھی ضرور بھجوائے۔

جب ان سے چوڑیوں کی قیمت کے بارے میں پوچھا گیا تو انیقہ کا کہنا تھا کہ انہیں فی الحال قیمت کا علم نہیں ہے، لیکن اگر کہیں آن لائن دستیاب ہوئیں تو وہ ضرور منگوا لیں گی۔ اداکارہ کے اس انٹرویو کے بعد سوشل میڈیا پر ان کے مداح کافی متحرک نظر آ رہے ہیں اور بہت سے فینز نے ان سے تحفہ بھیجنے کے لیے ان کا پتہ بھی پوچھنا شروع کر دیا ہے تاکہ وہ اپنی پسندیدہ اداکارہ کی یہ خواہش پوری کر سکیں۔