عمار بیگ کے نئے او ایس ٹی ’ تیرے عشق میں‘ نے ریلیز ہوتے ہی دھوم مچا دی

نامور گلوکار وارث بیگ کے صاحبزادے اور معروف گلوکار عمار بیگ اور گلوکارہ نومل راؤ کی آواز میں ڈراما سیریل ’مدار‘ کا نیا او ایس ٹی (OST) ’تیرے عشق میں‘ باقاعدہ طور پر ریلیز کر دیا گیا ہے۔ عمار بیگ نے ایک بار پھر اپنی مدھر آواز اور منفرد اندازِ گائیکی سے مداحوں اور خصوصاً نوجوانوں کو سحر انگیز کر دیا ہے۔ گانے کی ریلیز کے بعد سے یہ سوشل میڈیا اور مختلف پلیٹ فارمز پر تیزی سے وائرل اور مقبول ہو رہا ہے۔

’تیرے عشق میں‘ کے بول اور موسیقی ساجد حسین چاکو نے ترتیب دی ہے، جس میں محبت، جذبے اور جدائی کے رنگوں کو عمار بیگ اور نومل راؤ نے اپنی آواز سے مزید دلکش بنا دیا ہے۔ عمار بیگ کے مداحوں کے لیے ایک اور بڑی خوشخبری یہ ہے کہ ان کا معروف قوال و گلوکار راحت فتح علی خان کے ساتھ مشترکہ گانا بھی جلد سامنے آنے والا ہے۔ اس سے قبل عمار بیگ کے گانے ’جوگیا‘ نے ریلیز کے پہلے ہی دن ایک ملین سے زائد ویوز حاصل کیے تھے، جس کے بعد ان کی مقبولیت میں بے پناہ اضافہ دیکھنے میں آیا۔ واضح رہے کہ ڈراما سیریل ’مدار‘ 23 ستمبر سے ہر پیر تا جمعہ رات 9 بجے نشر کیا جائے گا۔