برطانیہ کی اپیل کورٹ نے شامی پناہ گزین کے معاملے میں حکومتی قانونی غلطی کی نشاندہی کردی

برطانیہ کی اپیل کورٹ نے ایک اہم اور تاریخی فیصلہ سناتے ہوئے قرار دیا ہے کہ برطانوی حکومت نے ایک شامی پناہ گزین کی درخواست کے معاملے میں سنگین قانونی غلطی کی، جسے لیبیا میں تاوان کے لیے اغوا کے بعد شدید تشدد کا نشانہ بنایا گیا تھا۔ برطانوی حکام نے اس کیس کو انسانی اسمگلنگ اور استحصال سے متعلق قوانین کے تناظر میں پرکھنے پر غور نہیں کیا تھا۔

برطانوی اخبار ‘دی گارڈین’ کے مطابق، عدالت کے اس فیصلے کے بعد برطانیہ پہنچنے کے دوران تاوان کے لیے یرغمال بنائے جانے والے دیگر پناہ گزین بھی انسانی اسمگلنگ کے متاثرین کے لیے مختص سرکاری امداد، تحفظ اور بحالی کی سہولیات حاصل کرنے کے اہل قرار پا سکتے ہیں۔ یہ مقدمہ ایک شامی شہری نے دائر کیا تھا جو 2021ء میں شام میں جبری فوجی بھرتی سے بچنے کے لیے ہجرت کر کے لیبیا پہنچا، جہاں مسلح گروہوں نے اسے یرغمال بنا کر تاوان وصول کیا۔ بعد ازاں وہ مئی 2022 میں ایک چھوٹی کشتی کے ذریعے برطانیہ پہنچا اور سیاسی پناہ کی درخواست دی۔

برطانوی محکمہ داخلہ (ہوم آفس) نے ابتدائی طور پر موقف اپنایا تھا کہ چونکہ متاثرہ شخص کو بلا معاوضہ کام پر مجبور نہیں کیا گیا، اس لیے اسے انسانی استحصال کا شکار نہیں مانا جا سکتا۔ تاہم اپیل کورٹ نے حکومتی موقف کو رّد کرتے ہوئے قانونی غلطی کی نشاندہی کی اور کیس پر ازسرنو جائزہ لینے کا حکم دیا۔