دبئی میں پاکستان انٹرنیشنل پراپرٹی ایکسپو کا 14واں ایڈیشن شروع، اربوں روپے کے منصوبوں کی نمائش

دبئی میں پاکستان انٹرنیشنل پراپرٹی ایکسپو کے 14ویں ایڈیشن کا شاندار آغاز ہو گیا ہے، جہاں پاکستان کے نامور رئیل اسٹیٹ ڈویلپرز نے اوورسیز پاکستانیوں اور بین الاقوامی سرمایہ کاروں کے لیے اربوں روپے مالیت کے جدید رہائشی اور تجارتی منصوبے پیش کیے ہیں۔

گلوبو ایشیا ایگزیبیشنز کے زیرِ اہتمام منعقدہ اس دو روزہ نمائش میں فیصل ٹاؤن گروپ نے بطور ٹائٹل اسپانسر شرکت کی، جبکہ پاکستان کے سابق کرکٹ کپتان شاہد آفریدی کی بطور مہمانِ خصوصی آمد نے تقریب کو چار چاند لگا دیے۔ نمائش کا بنیادی مقصد بیرونِ ملک مقیم پاکستانیوں کو محفوظ اور قابلِ اعتماد سرمایہ کاری کے مواقع فراہم کرنا ہے تاکہ ملک میں بھی غیر ملکی زرِ مبادلہ کی آمد کو یقینی بنایا جا سکے۔

میڈیا سے گفتگو کرتے ہوئے ایکسپو کے منتظمین عمران خٹک، میاں منیر ہانس اور رئیل اسٹیٹ مندوب راجہ سجاد حسین نے بتایا کہ یہ نمائش پاکستانی رئیل اسٹیٹ شعبے اور اوورسیز سرمایہ کاروں کے مابین رابطے کا بہترین پل ثابت ہو رہی ہے۔ انہوں نے اعلان کیا کہ دبئی میں شاندار کامیابی کے بعد پراپرٹی ایکسپو کا اگلا ایڈیشن سعودی عرب کے شہر جدہ میں منعقد کیا جائے گا۔