علامہ اقبالؒ کے یوم ولادت کے موقع پر واشنگٹن ڈی سی میں خصوصی تقریب

امریکا میں متعین پاکستان کے سفیر رضوان سعید شیخ نے کہا ہے کہ مفکرِ پاکستان علامہ اقبالؒ کی بصیرت افروز شاعری اور افکار کے پاکستان کی قومی تاریخ اور شناخت پر انمٹ نقوش ثبت ہیں۔ واشنگٹن ڈی سی میں سفارت خانہ پاکستان کے زیرِ اہتمام علامہ اقبال کے یومِ ولادت کے موقع پر منعقدہ خصوصی تقریب سے خطاب کرتے ہوئے سفیرِ پاکستان نے کہا کہ ہماری قومی زندگی کی فکری اساس اقبال کے نظریات سے وابستہ ہے۔ انہوں نے روشنی ڈالی کہ شاعرِ مشرق نے اپنی نثر اور نظم کے ذریعے برصغیر کے مسلمانوں میں خودی، خودمختاری اور خود ارادیت کا شعور بیدار کیا، جبکہ ان کا ‘تصورِ شاہین’ نوجوانوں کو جرأت اور حصولِ کمال کا درس دیتا ہے۔ اس پروقار تقریب میں پاکستانی کمیونٹی کے رہنماؤں، صحافیوں اور مختلف مکاتبِ فکر کے افراد نے شرکت کی اور حکیم الامت کو شاندار الفاظ میں خراجِ تحسین پیش کیا۔