ایران کیساتھ جنگ عملی طور پر ختم ہوچکی، امریکی بحری ناکہ بندی سے مطمئن ہوں: صدر ٹرمپ

امریکی صدر ڈونلڈ ٹرمپ نے اعلان کیا ہے کہ ایران کے ساتھ جاری جنگ عملی طور پر ختم ہو چکی ہے اور فی الحال مزید فوجی کارروائی کی ضرورت نہیں، تاہم ضرورت پڑنے پر امریکہ کسی بھی وقت حملے دوبارہ شروع کرنے کا اختیار رکھتا ہے۔ وائٹ ہاؤس میں قطر کے وزیراعظم شیخ محمد بن عبدالرحمان آل ثانی سے ملاقات کے بعد میڈیا سے گفتگو کرتے ہوئے صدر ٹرمپ نے کہا کہ وہ تہران کے ساتھ نئے معاہدے کے منتظر ہیں اور سعودی عرب و قطر کی طرح امریکہ کی بھی یہی ترجیح ہے کہ تنازع کا پرامن حل نکالا جائے۔ انہوں نے واضح کیا کہ ایرانی قیادت بخوبی جانتی ہے کہ انہیں امریکہ کی شرائط تسلیم کرنا ہوں گی اور ان کے پاس جوہری ہتھیار حاصل کرنے کا کوئی آپشن موجود نہیں ہے۔ صدر ٹرمپ نے ایران کے خلاف جاری بحری ناکہ بندی پر اطمینان کا اظہار کرتے ہوئے یہ بھی بتایا کہ روس یوکرین جنگ کے خاتمے کے لیے ابوظہبی میں ہونے والے مذاکرات میں اہم پیشرفت کا قوی امکان ہے۔