امریکی عوام اسرائیلی جنگوں سے تنگ آ چکے ہیں: عباس عراقچی

ایران کے وزیرِ خارجہ عباس عراقچی نے امریکی نشریاتی ادارے ‘سی بی ایس’ کو دیے گئے صدر ڈونلڈ ٹرمپ کے تفصیلی انٹرویو پر ردِعمل دیتے ہوئے کہا ہے کہ اسرائیل مسلسل امریکی انتظامیہ کو نہ ختم ہونے والی جنگوں میں دھکیل رہا ہے جس سے خود امریکی اور مشرقِ وسطیٰ کے عوام تنگ آ چکے ہیں۔ عباس عراقچی نے کہا کہ امریکی صدر اس حقیقت سے واقف ہیں کہ امریکی عوام کی اکثریت اسرائیل کے اقدامات سے نالاں ہے، تاہم ٹرمپ اس عوامی ناراضی کی بنیادی وجوہات سمجھنے میں الجھن کا شکار نظر آتے ہیں۔ انہوں نے وائٹ ہاؤس کو متوجہ کرتے ہوئے دہرایا کہ امریکی ووٹرز اپنا فیصلہ سنا چکے ہیں اور اب فیصلے کی باری واشنگٹن کی ہے۔ ایرانی وزیرِ خارجہ نے واضح کیا کہ تہران کی جانب سے تمام محاذوں پر جنگ کے خاتمے کی پیش کردہ 2 روزہ امن تجویز اب بھی برقرار ہے؛ اگر امریکہ عملی اقدامات کرے تو اگلے ہی روز آبنائے ہرمز کو بحری ٹریفک کے لیے کھول دیا جائے گا، تاہم اگر امریکہ نے جنگ کا راستہ چنا تو ایرانی فورسز اس کا دندان شکن جواب دیں گی۔